УИХ болон аймгийн ИТХ-ын сонгуульд ялалт байгуулсан аймгийн МАН-ын хорооноос хэвлэлийн бага хурал зарлалаа. Хуралд УИХ-ын сонгуулийн 48 дугаар тойрогт ялалт байгуулсан Д.Дамба-Очир, МАН-ын Бага хурлын гишүүн Д.Атармаа, аймгийн ИТХ-ын 30 мандатад ялалт байгуулсан төлаөөлөгчид оролцсон юм. Аймгийн МАН-ын хорооны дарга Д.Батлут “Юуны өмнө МАН-ыг УИХ болон аймгийн ИТХ-ын сонгуульд дэмжин итгэл хүлээлгэсэн Орхон аймгийн мянга мянган сонгогч та бүхэндээ баярлалаа гэж хэлмээр байна. Та бүхний манай намд өгсөн саналын үр дүнд бид өнөөдөр УИХ-д намаасаа хоёр төлөөллийг гаргаж чадлаа. Аймгийн ИТХ-д одоогийн байдлаар 30 суудал аваад байна. Энэхүү их итгэл найдварыг бид бүхэн хичээл зүтгэлээр хариулах болно. Манай намын хувьд та бүхнийхээ итгэлийг татахын тулд сонгогч түмнийхээ үгийг сонсч түүн дээрээ тулгуурлан амьдралд ойр мөрийн хөтөлбөр боловсруулсан нь та бүхнийг бидэнд итгэх итгэлийг төрүүлсэн гэж бодож байна. Бид багаараа, намаараа хийсэн бүтээсэн ажлаараа итгэлийг тань хариулах болно” гэлээ. Энэ үеэр 48 дугаар тойрогт ялалт байгуулсан МАН-ын бага хурлын гишүүн Д.Дамба-Очир “Эрдэнэтийн Дамба-Очиртоо итгэж саналаа өгсөн та бүхэндээ баярлалаа гэдгээ хэлмээр байна. Манай намыг, манай багийг сонгосон та бүхний сонголт алдаагүй гэдгийг бид хамтдаа харуулна. Сонгуулийн санал авах өдрийн өмнөхөн Эрдэнэт үйлдвэрийн 49 хувь нийгэмд асуудал үүсгэсэн. Манай намын хувьд Оросын тал 49 хувиа үнэхээр худалдахаар болсон бол үүнийг нь Засгийн газар худалдан авах ёстой гэсэн байр суурьтай байгаа. Мөнгөгүй бол эдийн засгийн аргаар мөнгө босгож Эрдэнэт үйлдвэрийн 49 хувийн төр өөрийн мэдэлдээ авах ёстой гэсэн зарчмыг бид баримталж байна. Түүнээс биш цөөн тооны хэдэн хүн 49 хувийг эзэмших ёсгүй. Засгийн газар, Монголын төр 49 хувийг эзэмшиж түүнээс нь иргэд тэгш эрхээр хүртэх ёстой. Бид энэ үзэл баримтлалаасаа буцахгүй гэдгийг хариуцлагатайгаар мэдэгдэж байна” хэмээсэн юм. МАН-ын бага хурлын гишүүн Д.Атармаа “Би Эрдэнэтэд битүү морь шиг ирсэн нь үнэн. Гэхдээ миний төлөө саналаа өгсөн, надад итгэсэн, манай багийг нийтээр нь сонгосон эрдэнэтчүүд та бүхэндээ маш их баярлалаа. Цаашид миний бие эрдэнэтчүүд та бүхнийхээ төлөө багийн нөхдийнхөө хамт, та бүхэнтэйгээ хамтран зүтгэхэд бэлэн байна” гэж байр сууриа илэрхийллээ.