Энэ мэдээллийг саяхан болж өнгөрсөн аймгийн ИТХ-ын хуралдаан дээр Улсын бүртгэлийн хэлтсийн дарга Ж.Сандуйжав төлөөлөгчдөд өгсөн юм. Түүний хэлснээр аймгийн хүн амын тоо сүүлийн хоёр жилд тодорхой хэмжээгээр буурч байгаа гэнэ. Хүн амын тоонд нөлөө үзүүлдэг хоёр шалтгаан байдаг аж. Нэгдүгээрт, төрөлт нас баралтын харьцаа байдаг бол хоёрдугаарт, шилжин ирэлт, шилжин явалтын зөрүү хүн амын тоонд тодорхой нөлөө үзүүлдэг байна. 2014 оны байдлаар аймгийн хэмжээнд 2546 төрөлт бүртгэгдсэн бол нас баралт 603 байжээ. Мөн онд өөр аймаг, хотоос манайд 2334 иргэн шилжиж ирсэн байна. Харин өөр аймаг, хот руу 4516 иргэн бүрмөсөн явах шилжилт хөдөлгөөн хийлгэжээ. Тэгвэл 2015 оны эхний есөн сарын байдлаар аймгийн хэмжээнд 1830 төрөлт бүртгэгдсэн бол нас баралт 442 байна гэсэн албан ёсны тоо гарчээ. Шилжилт хөдөлгөөний хувьд энэ оны эхний 9 сарын байдлаар өөр, аймаг хот руу 2596 иргэн нүүж явжээ. Эхний 9 сарын дүнгээр өөр аймаг, хотоос 1944 иргэн манай нутагт шилжин ирсэн байна. Эндээс харвал шилжин ирж байгаа иргэдээсээ шилжиж явалт нь бараг хоёр дахин их байгаа нь хүн амын өсөлтөд нөлөө үзүүлж байгааг бодолцох цаг болсон гэдгийг Ж.Сандуйжав дарга иргэдийн төлөөлөгчдөд санууллаа.