Аймгийн АН-ын санаачилсан “200 айлын эко хороолол” төслийн гүйцэтгэгч байгууллага болох “Монгол дайван” компанийг Засгийн газрын хэрэгжүүлэгч агентлаг болох Шударга өрсөлдөөн хэрэглэгчийн төлөө газраас шалгаж байгаа ажээ. Тус газраас хийгдэж байгаа шалгалтын зорилго нь эко хороолол баригдах газрыг ямар ч сонгон шалгаруулалтгүйгээр, давуу эрхтэйгээр нэг компанид олгосон гэдэгт байгаа аж. Өнгөрөгч сарын сүүлчээр Шударга өрсөлдөөн хэрэглэгчийн төлөө газрын байцаагчид ирж эко хороолын газрын хэмжээг авч төслийн сонгон шалгаруулалтын баримт бичигтэй танилцсан байна. Өнөөдрийн байдлаар “Монгол дайван” компанийн төслийн ажил гурван жилийн хугацаанд ажлын гүйцэтгэл 30 хувьдаа ч хүрээгүйгээр үл барам төслийн үндсэн зорилгоос хазайсан гэгддэг. Улсын хэмжээнд жишиг болох эко хороолол манай аймагт балгас болоод хэдэн жилийн нүүр үзэж байгаа бол ажлын гүйцэтгэгч болох “Монгол дайван” компанийнхан Орхон аймгийн удирдлагад тэр бүр олддоггүй аж. Тэдний нуугдмал байдал, төслийн ажлын явц зэргээс харвал хэн нэгэн томоохон даргын нөмөр нөөлөгт багтсантай холбоотой хэмээн үздэг байна. Гэтэл үүнийг батлах гэсэн мэт “Монгол дайван” болон “Атмор” компани нь УИХ-ын дарга З.Энхболдынх гэсэн яриа Эрдэнэтэд тэнүүчлэх болжээ. Орон нутгийн эрх барих дээд байгууллага болох аймгийн ИТХ нь “Монгол дайван”-ы удирдлагыг царайчилж хэзээ ирж уулзахыг нь нүдээ хөхөртөл харж суугаа байдлаас үзвэл үнэхээр дээрх тэнэмэл яриа үнэний ортой ч юм шиг.