Кенийн нийслэл Найроби хотноо байрлах “Гарисса” их сургуульд хэт даврагч “Аль Шабаб” бүлэглэл халдлага үйлдэж, 147 хүний аминд хүрсэн байна. Халдлагын үеэр тус сургуульд суралцдаг 587 оюутан террористуудын гараас мултарч чадсан бөгөөд тэдний 79 нь шархтсан ажээ. Энэхүү дэлбэрэлтийн үеэр аврах ажиллагаанд оролцсон зарим албан хаагчид ч мөн шархтжээ. Амиа алдсан хүмүүсийн ихэнх нь христийн шашинтай хүмүүс байсан гэж цагдаагийн газраас мэдэгдсэн байна. Хэт даврагчид олон хүний аминд хүрсэн шалтгаанаа “Барууны шашин шүтэж, хайрладаг хүмүүс бидэнд хэрэггүй” гэж тайлбарлажээ. Халдлага үйлдсэн этгээдүүд тэсрэх бөмбөг бүхий хантааз өмсөн АК-47 буугаар зэвсэглэсэн байсан ба гэмт халдлага үйлдсэн дөрвөн этгээд аврах ажиллагааны үеэр амиа алдсан байна. Гэхдээ гэмт этгээдүүд тэсрэх бөмбөг бүхий хантаазаа санаатайгаар дэлбэлсэн үү, эсвэл цагдаа нарын бууны суманд өртөн дэлбэрсэн үү гэдэг нь тодорхойгүй байгаа аж. Дээрх аймшигт халдлага гарсны дараа шөнийн дотор улс орон даяар хөл хорио тогтоосон байна. Эх сурвалж: new.mn