“Масс агентлаг” хөлбөмбөгийн ДАШТ-ийг шууд дамжуулан үзүүлэх гэж буйтай холбогдуулан “Миний үзсэн хамгийн гоё ДАШТ” сэдэвтэй цуврал ярилцлагыг олны танил эрхмүүдээс авч байгаа. Энэ удаа УИХ-ын гишүүн Ч.Сайханбилэг бидний урилгыг хүлээн авч, сэтгэлд хоногшсон тэмцээнийхээ талаар дурсамжаа хуваалцлаа. -Таныг хөл бөмбөгийн хорхойтон гэж сонссон. Үзэж байсан хамгийн гоё ДАШТ, хамгийн сайхан тоглолт гэвэл алийг нэрлэх вэ? -ДАШТ-д хамгийн шилдгүүд оролцдог гэдэг утгаараа маш олон тэмцээн байна л даа. Гэхдээ хамгийн хамгийн гэвэл яг одоо толгойд бууж байгаа нь 1982 онд Испанид болсон ДАШТ-ий Бразил-Италийн тоглолт байна. Тэр үеийн Бразилийн шигшээ хэнд ч ялагдашгүй, домог мэт баг байсан. Плей-офф эхлэхэд Италийн шигшээтэй хийсэн тоглолтод тэр агуу баг 3:2-оор ялагдал хүлээж байлаа. Итали ч Бразилийг хожчихсон болоод тэр үү, тэр жил түрүүлсэн. Тэр бол үнэхээр гайхалтай, дахин үзээд ч уйдамгүй тоглолт болсон. Тоглогчдын техник, ур чадвар, тоглолын үйл явдал гээд бүх л юм сонирхолтой, сайхан байсан. 1982 оны ДАШТ-ийг одоогийн залуус маань үзээгүй, санахгүй байж магадгүй. Хайж олоод үзвэл их гоё шүү. -Энэ жилийн тэмцээнийг үзнэ биз дээ? -Үзэхгүй байж болохгүй шүү дээ. Би 1978 оны Аргентинд болсон ДАШТ-ээс хойш бүх тоглолтыг үзэж байна. Тийм болохоор энэ жилийн тоглолтуудыг ч үзнэ. Зургаа, долдугаар сар их ачаалалтай өнгөрөх юм шиг байна. Нүдээ нухалсан, хүнд сар болж өнгөрөх байх. Яагаад гэвэл тоглолтууд дандаа шөнө болох юм билээ. Ажлынхаа зав, чөлөөгөөр үзэх байх. Зарим тоглолтыг бичлэгээр ч үзэх юм уу зохицуулна даа. Гэхдээ дэлхийн аваргыг бичлэгээр үзнэ гэдэг цаанаа л нэг тиймэрхүү байдаг. Тийм учраас аль бололцоогоороо үзнэ. -Таны дэмждэг баг? -Мэдээж Монголын шигшээ баг оролцвол байгаа бүхнээ тавиад “Аll in” гээд л сууна шүү дээ. Гэхдээ хүүхэд наснаасаа үзсэн болоод тэр үү Оросын шигшээг дэмждэг. Премьер лигийн бүх тоглочдыг нь таньдаг гэдэг утгаараа Английн шигшээг бас харна. Мөн Европт Испани, Голланд гэсэн гоё тоглолттой хоёр шигшээ баг байгаа. Мэдээж Аргентин, Бразил бас энэ жил гоё байгаа. Ингээд дуртай спортоороо ярилцлага өгөх сайхан байна шүү. Монголчууд маань сүүлийн хэдэн сар баахан л улстөржлөө. Одоо спортоор өөрсдийгөө цэнэглээд, стрессээ тайлах байх гэж найдаж байна. Дахин хэлэхэд миний хувьд нойр алдсан, ядарсан сар байх болов уу. Наадмын дараа хүчээ сэлбэж авна даа. Эх сурвалж: http://www.mass.mn/