Тийм ээ, хамгийн хэрэгтэй гэдэг үгийг олонхи нь хэлэх болов уу. Дахин төлөвлөлтийг сайн хийснээр Барилгажилт нэмэгдэж орчин үеийн орон сууцанд хамрагдах иргэдийн тоо үлэмж нэмэгдэнэ. Амьдралын чанарын үнэлэмжинд ч тодорхой хэмжээгээр нөлөөлнө.

Өнөөдөр Баян-Өндөр суманд 105 мянга гаруй, Жаргалант суманд 3500 орчим иргэн амьдарч байна. Аймгийн нийт хүн ам 108 мянга гаруй гэсэн үг. Манай аймаг 2022 оны байдлаар 84 мянга 517 га газар нутагтай гэж албан ёсны тоо баримтад дурьдагдсан байна. Баян-Өндөр сум буюу Эрдэнэт хот бол 27827 га буюу аймгийн хэмжээний нийт нутаг дэвсгэрийн 33 хувийг эзэлдэг. Харин Жаргалант сумын хувьд нийт газар нутгийн 67 хувь буюу 56 мянга 690 га нутаг дэвсгэртэй. Орхон аймгийн энэхүү 84.5 мянган га нутаг дэвсгэр нь Монгол Улсын нийт нутгийн 0.054 хувь нь ажээ. Нэг үгээр бол өчүүхэн төдий газар нутагтай гэсэн үг. Тэгвэл хүн амын хувьд бид нийт монголчуудын 3.5 хувийг эзэлж байна. Бүр цаашилбал их сонирхолтой дүр зураг харагдана. Нийслэл Улаанбаатар хотод нэг ам дөрвөлжин метр газар дээр 3,03 хүн амьдардаг бол Орхон аймагт түүнээс бүр илүү 4,26 хүн амьдарч байна. Нэг ам метр газарт 4 том хүн 1 хүүхэд багтаж байна гээд бодвол ч...

Манай аймгийн хувьд эрх баригчид маань Орон нутгийнхаа хөгжлийн ерөнхий төлөвлөгөөг нэлээн хэдэн удаа хийжээ. Хамгийн эхэнд 1975 онд хийсэн бол 1985, 2000 онд түүндээ өөрчлөлт оруулсан байна. 2005 онд Засгийн газрын дэмжлэгтэйгээр төлөвлөгөөндөө өөрчлөлт оруулсан байх юм.

Хангайн бүсийн тулгуур төв Эрдэнэт хотыг 2020 он хүртэл хөгжүүлэх хөгжлийн Ерөнхий төлөвлөгөөг төлөвлөхдөө 2020 онд хотын хүн амыг 131 мянга 500 байхаар, орон сууцны 19 хороололтой байхаар тусгасан байна. Энэ төлөвлөгөөний хүрээнд 2020 он гэхэд Барилгажсан хороолол 6 /1,2,3,4,5,6/ байхаар, Барилгажилтын ажил явагдаж байгаа хороолол 8 /1а, 2а, 7а, 7, 8, 10, 16, 19/ байна гэж төлөвлөсөн байдаг.

Энэхүү төлөвлөгөөг өөрчлөх ажил өрнөж байгаа аж. Бүр нарийвчилбал, “Хангайн бүсийн тулгуур төв Эрдэнэт хотын 2040 он хүртэлх Хөгжлийн ерөнхий төлөвлөгөө”-г хийлгэхээр аймаг орон нутаг захиалгаа өгч түүний дагуу БХБЯ-ны сайдын 68 тоот дугаартай Ажлын даалгавар батлагдсан байна. Энэхүү даалгаврын дагуу БХБЯ-наас Зөвлөх үйлчилгээ өгөх аж ахуйн нэгжийг сонгон шалгаруулах тендэрийг зарласан. Ажлын нийт төсөвт өртөг нь 2 тэрбум төгрөг. Орхон аймаг, Эрдэнэт хотыг Дахин барилгажихад, Дахин төлөвлөлт хийхэд дээрх тендэр зайлшгүй шаардлагатай, цаг үеэ олсон ажил болсон нь харагддаг. Энд нэг зүйлийг заавал тодотгох шаардлагатай. Учир нь, манай аймгийн газар нутгийн Газрын нэгдмэл сангийн бүтцийн зургаас ажихад Баян-Өндөр сумын нийт нутаг дэвсгэрийн 40 хувь буюу 12 мянган га газарт суурьшлын бүсийн зориулалтаар төлөвлөлт хийх боломжтой гэсэн судалгаа гарчээ. Эндээс харвал Орхон аймаг, Эрдэнэт хотод Дахин төлөвлөлт- Барилгажилт хэрэгтэй юу гэвэл тийм гэж хүн бүхэн хэлэх болов уу. Айлаас эрэхээр авдраа уудал гэдэгчлэн “Бид газар нутаг багатай, хилийн цэсэд өөрчлөлт оруулах учиртай” гээд цээжээ дэлдэхийн оронд нөөц бололцоогоо ашиглах гэж байгаа өнөө үеийн аймгийн удирдлагын хэрэгжүүлж байгаа Дахин төлөвлөлт түүнтэй урган гарч ирсэн бүтээн байгуулалтын олон ажилд бид Хүчээ нэгтгэх цаг болж.