Баян-Өндөр сумын сонгуулийн хорооны дарга Х.Машбатаас дараах тодруулгыг авлаа. -Нэр дэвшигчид үнэмлэхээ гардаж авсанаас хойш багагүй хугацаа өнгөрлөө. Баян-Өндөр сумын сонгуулийн хорооны ажил ямар шатандаа явж байна вэ? -Баян-Өндөр сумын Уурхайчин багт сумын ИТХ-ын 11 дүгээр тойрог дээр нөхөн сонгууль зарлагдсан. Нөхөн сонгуулийн ажил хуулийн дагуу хугацаандаа эхэлсэн. Есдүгээр сарын 2-нд МАН, АН, МАХН-аас нэр дэвшсэн гурван нэр дэвшигчийн үнэмлэхийг нь гардуулж өгснөөр сонгуулийн сурталчилгааны ажил албан ёсоор эхэлсэн. Мөн нэр дэвшигчдийн шадар туслах, штабын гишүүдийн ажилтны үнэмлэхийг гаргаж өгсөн. Энэ удаагийн нөхөн сонгууль хуучин хэлбэрээр явагдана. Өөрөөр хэлбэл саналаа өгөх иргэд сонгогчийн үнэмлэхээ авч байж санал хураалтад оролцож учиртай. -Уурхайчин багт сонгуулийн насны хэдэн хүн байна вэ. Албан ёсны тоо нь гарсан уу? Уурхайчин багт 4310 сонгогчийн нэрсийн жагсаалт гарсан. Дээрх сонгогчид хоёр хэсэгтээ хуваагдаад байгаа. Нэгдүгээр хэсэг дээр 2153, хоёрдугаар хэсэгт 2157 сонгогч бүртгэгдсэн. -Сумын ИТХ-ын энэ удаагийн нөхөн сонгуулийн ирцийг хангах тал дээр та бүхэн хэрхэн ажиллаж байна вэ? -Сумын Сонгуулийн хорооны үндсэн гол ажил нь энэ юм. Сонгуулийн ирцийг хүргэх, сонгогчдод мэдээллийг хүргэх тал дээр анхаарлаа хандуулан ажиллаж байгаа. Сумын сонгуулийн хороо иргэдэд мэдээлэл өгөх ажлын төлөвлөгөө гарган ажиллаж байна. Хэвлэл мэдээллийн байгууллагуудад хандаж албан хүсэлт гаргасан. -Сонгогчийн үнэмлэх тараалт ямар шатандаа явж байна вэ? -Сонгогчийн үнэмлэхийг тараахын өмнө хоёр хэсгийн хорооныхоо гишүүдэд богино хэмжээний сургалт зохион байгууллаа. Өнөөдрийн байдлаар сонгогчийн үнэмлэх тараах ажил хэвийн явагдаж байна. Гэхдээ энэ ажилд хүндрэлтэй зүйл гарч байгааг хэлэх нь зөв байх. Тухайн сонгогчийн хаягаар очиход өөр хүмүүс байх, оюутнууд сууж байх гээд асуудал гарч байна. Өнөөдрийн  12.00 цагийн байдлаар нэгдүгээр хэсэг 851 сонгогчийн үнэмлэхийг тараасан. Энэ нь нийт сонгогчийн 39.5 хувь болж байгаа. Хоёрдугаар хэсэгт 925 сонгогчийн үнэмлэхийг тараасан. Энэ нь 42.8 хувьтай үзүүлэлт. Ойрын үед дээрх хоёр хэсэг сонгогчийн үнэмлэхийг тараах ажилд гол анхаарлаа хандуулж ажиллана. Урьдчилсан байдлаар санал авалт маргаашнаас хуулийн дагуу явагдана. Сумын сонгуулийн хорооноос хоёр хэсгээрээ дамжуулан иргэдэд “санамж” мэдээллийг хүргэж байгаа. Санамжийг орон сууцны байр, эмийн сан, цэцэрлэг, сургуулийн ханан дээр нааж байгаа. -Уурхайчин бол уурхайчдын хотхон. Ээлжийн ажилтай иргэдийн санал өгөх эрхийг хэрхэн хангаж байна вэ? -Энэ талаар бид ажиллаж байгаа. “Эрдэнэт үйлдвэр” ХХК-ийн удирдлагуудад Уурхайчин багт амьдардаг үйлдвэрийн ажилчдыг саналаа өгөх боломжоор хангаж өгнө үү гэсэн албан бичгийг хүргүүлсэн. 9 сарын 14 хэдийгээр амралтын өдөр боловч ээлжийн ажилчид бол байгаа. Энэ сарын 12, 13-нд багийн нутаг дэвсгэр дээр чанга яригчаар сонгогчдод сонгуульдаа идэвхтэй оролцох талаар мэдээлэл өгнө. Мөн 13-нд сонгуулийн талаарх мэдээллийг хэвлэлийнхэнд хүргэнэ. -Нэр дэвшигчид, намуудтай холбоотой гомдол, санал ирсэн үү? -Одоогийн байдлаар 3 нэр дэвшигчийн талаар болон нам, эвслийн талаар ирсэн гомдол, санал алга байна. Нам, эвсэлд сум,  аймгийн сонгуулийн хорооны зүгээс энэ удаагийн сонгуулийн сурталчилгааны ажилд төрийн албан хаагчдыг оролцуулахгүй байх, сургуулийн анги танхим, заалыг ашиглуулахгүй байх талаар санамж хүргүүлсэн. Зарим нэг иргэний зүгээс сонгууль автомат машинаар явагдана гэсэн хуультай байхад та бүхэн яагаад гараар тоолох гээд байна гэсэн сонирхсон гэхэд хэцүү асуудлыг тавьсан. Бид орон нутгийн сонгуулийн тухай хуулийн дагуу холбогдох хариу тайлбарыг хүргэж байна. -Сонгуулийн дүн ямар хугацаанд гарах вэ. Нэгдсэн дүн аймгийн Сонгуулийн хороон дээр ирсэний дараа албан ёсны дүн гарах уу? -Орон нутгийн сонгуулийн тухай хуулиар 22.00 цагт санал авах байрны хаалгыг хааж, хамгаалалтад авна. Үүнийхээ дараа хэсгийн хороод намуудын ажиглагчдын нүдэн дээр гар аргаар тоолно. Эхлээд нэг хайрцгаа тоолно, дараа нь хоёр дахь хайрцгаа тоолоод хэсгийн хорооны албан  ёсны тэмдэглэл үйлдэж гишүүд гарын үсэг зурна. Үүнийгээ сумын сонгуулийн хороонд ирүүлнэ. Манайх хоёр хэсгийн дүнг нэгтгээд аймгийн сонгуулийн хороонд явуулна. Ингэснээр нөхөн сонгуулийн дүн гарна.