Даваа гаригийн Засаг даргын шуурхай зөвлөгөөн хуралдлаа.  Хуралдаанаар аймгийн Цагдаагийн газар, БОЭТ, ОБГ зэрэг байгууллагын удирдлагууд   сар шинийн өдрүүдэд авч хэрэгжүүлсэн арга хэмжээний талаар болон цаг үеийн асуудлаар мэдээлэл хийв. 

Сар шинийн баярын өдрүүдэд цагдаагийн газрын 70351190 дугаарын утсанд 175 гомдол, санал иржээ. Үүнийг өмнөх жилтэй харьцуулахад 61 дуудлага буюу 25,8 хувиар буурсан үзүүлэлттэй байгааг аймгийн Цагдаагийн газрын дарга, цагдаагийн хурандаа  А. Лхагвадорж мэдээлэлдээ онцлов.  Мөн тэрээр, 2023 оны хоёрдугаар сарын аймгийн дүн мэдээг танилцууллаа. Тайлант хугацаанд нийт 2059 дуудлага мэдээлэл ирсэн нь өмнөх оны мөн үетэй харьцуулахад 8,2 хувиар буурсан үзүүлэлттэй байна. Хүлээн авч шалгасан гомдол мэдээллийн 40 гаруй хувь нь гэмт хэргийн шинжтэй, 60 хувь нь зөрчлийн шинжтэй байна.  Сар шинийн баярын өдрүүдэд 9 агентлагийн 12 албан хаагч хариуцлагатай эргүүлээр ажилласан бөгөөд дээрх хугацаанд ямар нэгэн хэрэг зөрчилгүй байсан талаар мэдээллээ. 

     Аймгийн Онцгой байдлын газрын дарга, хурандаа Г.Ганбаатар “Битүүн болон шинийн нэгэнд тус байгууллагад гал түймрийн хоёр дуудлага ирснийг шууурхай арга хэмжээ авч ажиллажээ. Мөн Монгол Улсын Шадар сайдаас ирүүлсэн захирамжийн хүрээнд аймгийн хэмжээнд үйл ажиллагаа явуулж буй 17 сүм, хийдэд галын аюулаас урьдчилан сэргийлэх үзлэг, зөвлөмжийг өгч ажилласан талаар мэдээллээ.  Мөн сар шинийн баярыг угтан “Цагаан сар” нэгдсэн арга хэмжээг зохион байгуулж 6200 гаруй айл өрхөд үзлэг хийн 1300 зөрчлийг илрүүлсэн  байна. 

     “Шинийн 5-н хүртэл түргэн тусламжийн 103-т 205 дуудлага ирсэн бол долоо хоногийн хэмжээнд 357 дуудлага иржээ.Үүнээс хүүхэд 35, том хүн 170, архины шаталгаантай 80 дуудлага ирсэн” гэх мэдээллийг БОЭТ-ийн захирал Ц.Наран-Эрдэнэ өглөө.  БОЭТ-ийн хүлээн авах буюу яаралтай тусламжийн хэсэгт 7 хоногийн хугацаанд 514 хүн эмнэлгийн тусламж үйлчилгээ авсны 406 нь сар шинийн өдрүүдэд үйлчлүүлжээ. Үүнийг өнгөрсөн долоо хоногтой харьцуулахад 30 хувиар нэмэгдсэн үзүүлэлт юм.  Авто осол 30, ахуйн хүрээний осол гэмтэл 133 бүртгэгдэж, эрүүл мэндийн тусламж үйлчилгээ авсан талаар мэдээллээ.