Аймгийн Орон нутгийн 2 тэрбум төгрөгийн хөрөнгө оруулалтаар Өмнөдийн дэд станцыг барьж ашиглалтад орууд байгаа талаар Үндэснйи олон нийтийн телевизийн “Цагийн хүрд” нэвтрүүлгээр орон даяар цацсан. Гэтэл гэр хорооллын иргэдээс тогны хүчдэл хэмжээндээ хүрэхгүй байгаа, 220 байхаас 150-170-ын хооронд хүчдэл хэлбэлзэж байгаад арга хэмжээ авч өгөхийг хүсч хандаж байгаа. Мөн гэр хорооллынхон шөнийн хөнгөлөлтөд хамрагдах гэтэл тогны хүчдэл муу учраас боломж байхгүй тул арга хэмжээ авч өгөхийг хүсэн гомдол гаргаж байгаа билээ.

Өмнөдийн дэд станц баригдаж улсын комисс ажиллах гэтэл тэрхүү комиссын дарга нь Яамнаас томилогдсон учраас ажил сунжирч байгаа аж. Үүнд аймгийн Засаг даргаас “Орон нутаг өөрийн хөрөнгө оруулалтаар Өмнөдийн дэд станцыг барьж байгуулсан. Яагаад Улсын комиссын дарга нь яамнаас томилогдох болов. Энэ тал дээр ажиллахыг ХОХБТХ-т үүрэг болгож байна” гэлээ. Эрчим хүчтэй холбоотой зарим холбогдох дүрэм, журмын хүрээнд Өмнөдийн дэд станцыг ашиглалтад оруулахад “өвлийн улиралд буюу арваннэгдүгээр сарын 15-наас дараа оны дөрөвдүгээр сарын 15-н хүртэл өндөр хүчдэлийн холболт хийхгүй байх ёстой” гэсэн заалт ихээхэн төвөг садаа учруулж байгаа аж.

Үүнд С.Батжаргал даргын хувьд “Асуудлыг судалж холбогдох яамтай холбоо барьж Өмнөдийн дэд станцыг улсын комисс хүлээн авч гэр хорооллын тогны хүчдэлийн уналтыг зогсоохын тулд ажиллах хэрэгтэй. Ингэхдээ аюулгүй ажиллагааны норм, дүрмийг хатуу баримтлан ажиллах”-ыг үүрэг болгосон юм.