Ромын Пап Франсис 2013 оны гуравдугаар сараас эхлэн Ромын Папаар сонгогдсоноос хойш анх удаа Ази тивд хөл тавьж өмнөд Солонгост хийх айлчлалаа эхлүүллээ.
Ромын Пап Өмнөд Солонгост айлчлах үеэрээ 18, 19-р зуунд шашин шүтлэгийнхээ төлөө амь насаа алдсан 124 Солонгосын Католик шашинтнуудын гэгээн дурсгалыг хүндэтгэн адислах юм. Уг ёслолын ажиллагаа энэ сарын 16-нд Сөүлийн Гвангвамун өргөн чөлөөнд болохоор товлогджээ.
Ромын Пап айлчлалын үеэрээ Севол онгоцны сүйрлээс амьд гарсан сурагчидтай уулзахаар төлөвлөсөн бөгөөд айлчлалын сүүлчийн өдөр тэрбээр Сөүлийн Мүеонг-Донг сүмд болох Энхтайван, эв нэгдлийн цугларалд оролцох аж.
