Аймгийн 2019 оны төсөвт төрийн байгууллагын дарга нар 10 машиныг 809 сая төгрөгөөр  худалдан авахаар хөрөнгийг нь ИТХ-аар батлуулсан байдаг. Өөрөөр хэлбэл, энэ жил 10 дарга шинэ машин зайдагнахаар хөрөнгө мөнгийг нь батлуулахын зэрэгцээ унах унааныхаа хүчин чадал, өнгийг нь ч захиалаад байсан. Ямар байгууллага, хэн гэдэг дарга энэ онд шинэ машин авч унах гэж байгаа тухай манай сайт албан ёсоор анх удаа эх сурвалжаас нь авч олон нийтэд ил болгосон. Олон нийт ч дарга нарыг машин авч унахаас өөр ажил хийгээгүй гэж цахим орчинд хүчтэй шүүмжилсэн. Олны хэл амнаас жийрхсэн үү ямар ч байсан дарга нар машин авч унах байсан 809 сая төгрөгөө багасгажээ. Тухайлбал, “Төсөл арга хэмжээний нэр өөрчлөх, хөрөнгө шилжүүлэх зардлын жагсаалт” гэгчийг гаргаж байгаад өнөөх 809 сая төгрөгнөөс 280 саяыг нь өөр зүйлд зарцуулахаар болжээ. Аймгийн ЗДТГ-ын албан хэрэгцээнд авто машин худалдан авах энэхүү 280 сая төгрөгөөр *** Баянцагаан багийн Соёлын төвийн хаяавчийг засварлахад 9 сая 950 мянган төгрөг *** Хүүхдийн бүтээл худалдан авахад 30 сая төгрөг *** “Мөнхсүндрэл-1” ӨЭМТ-д эхо аппарат худалдан авахад 60 сая төгрөг *** 24 дүгээр цэцэрлэгт тоног төхөөрөмж худалдан авахад 4 сая төгрөг *** 26 дугаар цэцэрлэгт тоног төхөөрөмж худалдан авахад 36 сая 450 мянга *** 27 дугаар цэцэрлэгт тоног төхөөрөмж худалдан авахад 40 сая 300 мянга *** Жаргалант сумын Соёлын төвд халуун агаар үлээх халаагуур суурилуулахад 5 сая 300 мянган төгрөг *** Баруун Дэнж 19-24 дүгээр гудамжинд зөөврийн худаг барихад 45 сая төгрөг ***  Баянцагаан баг Шинэ хороонд хүүхдийн тоглоомын талбай байгуулахад 45 сая төгрөг *** Эрдэнэ багийн Ахмадын байр тохижуулахад 2 сая төгрөг *** Цагаанчулуут багийн Ахмадын байр тохижуулахад 2 сая төгрөг зарцуулах гэнэ. Ингээд үлдсэн мөнгө болох 529 сая төгрөгөөр энэ онд албан хэрэгцээнд авто машин худалдан авах юм байна. Үүнд, ** Сум дундын ойн ангийн хэрэгцээнд автомашин авахад 25 сая төгрөг ** Баян-Өндөр суманд дунд оврын машин авахад 35 сая төгрөг ** Газар уснаа явагч тээврийн хэрэгсэл авахад 100 сая төгрөг ** Баян-Өндөр сумын ИТХ, ЗДТГ-т машин авахад 100 сая төгрөг ** Жаргалант сумын ЗДТГ-т машин авахад 50 сая төгрөг ** Хотын захирагчийн албанд машин авахад 139 сая төгрөг ** Цагдаагийн тоноглол бүхий машин авахад 25 сая төгрөг ** Байгаль орчны багц хууль тогтоомжийг хэрэгжүүлэх, хяналт шалгалтын ажлыг зохион байгуулахад шаардлагатай туулах чадвар сайтай машин авахад 30 сая төгрөг зарцуулахаар болжээ. Ямар ч байсан сонгуулийн өмнөх жил манай аймгийн зарим дарга, албан тушаалтнууд 529 сая төгрөгөөр машин худалдан авч унан тухлах юм байна. Харин аймгийн ЗДТГ-ын дарга Д.Соёлчхүүгийн 100 гаруй сая төгрөгөөр худалдан авсан “Прадо 150” машиныг хэрхэх тухай, улмаар энэ дарга дөрвөн жилд дор хаяж хоёр машин унаж зугаагаа гаргах нь хэр зөв зохистой талаар одоохондоо гаргасан шийдвэр дарга нарт алга. Саяхан даа, Д.Соёлчхүү даргын албан хэрэгцээнд унаж байсан аймгийн ЗДТГ-ын 00-03 ОРА машиныг нэгэн даргын авгай уначихсан давхиж явна гэсэн яриа гараад байгаа. Дарга нар шинэ машин аваад хуучнаа эхнэрүүдийнхээ дэлгүүр хэсэх хэрэгцээнд үйлчлүүлэхээр зориулалтыг нь өөрчилсөн юм болов уу даа, янз нь.