Эрдэнэт үйлдвэрийн зүгээс ӨАБНУ-ын “Стандарт” банкинд хэдэн сая ам.доллар төлөх болчихоод байгаа талаар сар шинийн баярын дараахан бид багагүй шуугицгаалаа. Яг үнэндээ тэр их хэмжээний өрийг “Стандарт” банкинд төлөх юм биш л дээ. БНХАУ-ын “ICBC” банкинд очих ёстой өр, мөнгө гэж ойлгох нь зөв болов уу. Учир нь өнгөрсөн онд Хятадын дээрх банк өнөөх алдарт “Стандарт”-ын хяналтын хувьцааны багцын  дийлэнхийг худалдаад авчихсан гэдгийг эргэн санах нь зөв болов уу. Гэхдээ бид өнөөдрийг хүртэл “Жастын Батхүү, Эрдэнэт үйлдвэрийн захирал асан Ганзориг, ТӨХ-ны дарга асан Сугар бүр цаашилбал Санжийн Баяр нар”-тай холбоотой гэж ойлгож , бодсоор ирсэн. Тэгвэл тун удахгүй Эрдэнэт үйлдвэрээс Хятадын тал өнөөх “Стандарт” банкинд төлөх өрийг нэхээд суучихвал нэг их гайхах хэрэггүй. Эзэн нь юмаа мэдэж эрэг нь усаа хашихын үлгэр тэр болох байх. [sgmb id="1"]Дээрх асуудлыг өнөөдөртөө биднээс хол дуулдаж байгаа хэрэг гээд түр орхиё. Ингэхэд Эрдэнэт үйлдвэр “Стандарт” банкинд өнөөдрийн байдлаар яг хэдэн сая ам.долларын өр төлөх болчихоод байна вэ. Өнгөрсөн долоо хоногт Засгийн газрын Хэрэг эрхлэх газрын дарга, сайд  Д.Оюун-Эрдэнэ Эрдэнэт үйлдвэрийн Ерөнхий захирал Х.Бадамсүрэнг дуудаж уулзсан. Уулзалтын дараа А.Бадамсүрэн захирал сэтгүүлчдэд өгсөн мэдээлэлдээ “Өнөөдрийн байдлаар төлбөрийн хэмжээ нийтдээ 110 орчим сая ам.доллар болоод байгаа” хэмээн мэдээлсэн. Харин УИХ-аас байгуулсан Ажлын хэсгийн ахлагч УИХ-ын дэд дарга Я.Санжмятавын хувьд дээрхээс өөр тоо хэлээд байгаа. Тэрбээр “Эрдэнэт үйлдвэрийн өрийн хэмжээ 130 сая ам.долларыг давчихаад байгаа” гэж мэдээлсэн. Түүгээр ч үл барам Эрдэнэтийн асуудлыг зохицуулахгүй бол Монгол Улсын гаднаас авах зээл тусламжид сөргөөр нөлөөлөөд зогсохгүй саалийн ганц үнээгээ алдахад хүрч магадгүйг сануулсан. Мөн өнгөрсөн оны эцсээр УИХ-ын гишүүн О.Баасанхүү Эрдэнэт үйлдвэрийн өрийн асуудлыг шийдвэрлэхгүй бол тун удахгүй Эрдэнэтчүүд Амарын талбайгаа өрөнд алдах дээрээ тулчихаад байна гэж сануулсан удаатай. Өрийн хэмжээ өдрөөс өдөрт нэмэгдэж улмаар Эрдэнэт хотын Амарын талбай, саалийн ганц үнээгээ алдах дээрээ тулчихаад байгааг мэдсээр хэрнээ дүлэгнэж суутал нэг л өдөр хэдэн хятад нөхөр ирээд “Эрдэнэт үйлдвэр биднийх” гээд шулганавал яах вэ. Манай эрх баригчид төдийгүй хууль хяналтынхан Жастын Батхүүгийн авсан зээлээс хувь хүртэх гээд хүлээгээд шийдэж чадахгүй удсаар байвал хэрэг бишдэж мэднэ. Засгийн газрын зүгээс “Стандарт”-ын өрийг эхний ээлжинд  Эрдэнэт үйлдвэрийн дэргэдэх “Эрсдэлийн сан”-гаас төлөх шийдвэрийг гаргаж магадгүй гэж зарим нэг хүн үзэж байна. Үйлдвэрийн зүгээс Хаалтын менежментийн дагуу “Эрсдэлийн сан”-г 2015 онд үйлдвэрийн Ерөнхий захирал асан Ц.Даваацэрэнгийн санаачлагаар байгуулсан. Хэрэв үнэхээр “Эрсдэлийн сан”-гаас төлөхөөр болвол Эрдэнэтчүүд бидний ирээдүйд хэрэглэх мөнгөний тодорхой хэсэг үгүй болж Орхон аймгийн иргэд хохирох нь. Эрдэнэтийн үе үеийн уурхайчид, Эрдэнэт хотын иргэд Жастын Батхүүгийн тавьсан өрийг “Эрсдэлийн сан”-гаасаа төлөхийг дэмжих болов уу.