Аймгийн Засаг даргын даваа гарагийн шуурхай зөвлөгөөн болов. Шуурхайн эхэнд аймгийн Засаг даргын зөвлөх, Монгол улсын гавьяат уурхайчин Д.Цагаач энэ зуны амралтаараа өөрийн гараар хийсэн 29 нэр төрлийн 63 ширхэг, 800 гаруй мянган төгрөгийн үнэ бүхий хүүхдийн оюун ухаан хөгжүүлэх тоглоомыг Гэр бүл, хүүхэд залуучуудын хөгжлийн газарт бэлэглэсэн юм. Д.Цагаач хэлэхдээ “Хүүхдийн сэтгэхүйг хөгжүүлэхэд, монгол арга ухаан, зан заншилд сургахад зориулж оньсон тоглоом хийсэн юм. Энэ тоглоомоор минь хүүхэд багачуул тоглож байгаасай, тэдний оюун ухаанд багахан ч гэсэн хөрөнгө оруулалт болоосой гэж хүсээд энэ газарт бэлэглэж байна” хэмээсэн юм. Үүний дараа аймгийн Биеийн тамир, спортын газрын дарга Н.Зулбаатар аймгийн Засаг дарга Д.Батлутад шагнал гардуулсан билээ. Энэ жил Монгол улсын Засгийн газраас нийтийн биеийн тамирыг хөгжүүлэх зорилгоор “Үндэсний спортын зургаадугаар их наадам”-ыг улс орон даяар зохион байгуулсан байдаг. Энэ удаагийн их наадамд манай аймгийн баг, тамирчид нийт дүнгээр 21 аймаг, 9 дүүргийг магнайлж тэргүүн байрт шалгарсан байна. Тэргүүн байрын шагнал болох Хүндэт өргөмжлөлийг аймгийн Засаг даргад гардууллаа. Хүндэт өргөмжлөлийг дагалдан 10 сая төгрөгөөр манай аймгийг шагнажээ.  Үүний дараа шуурхай үргэлжлэхэд аймгийн Засаг дарга Д.Батлут “Өнөөдрийн шуурхай ч шагнал урамшилтай, хүүхдэд зориулсан хандивтай аятайхан эхэлж байна шүү” хэмээсэн юм. Даан ч нэг их удалгүй шуурхайн даргалагч төдийгүй оролцогчдын хувьд иргэдээс ирүүлсэн санал хүсэлт, гомдын талаарх мэдээллийг  сонсоод Эрүүл мэндийн газрыг тойрсон, нохой бөөс зэрэг дарга нарын шийдвэрлэх олон асуудалд хариулт өгөхийн тулд баяр хөөр нь мэдэгдэл, тайлбараар үргэлжилсэн юм.          [sgmb id="1"]