Шинэ  хичээлийн жилд цэцэрлэгт явах хүүхдүүд шээсний шинжилгээ, цагаан хорхойн шинжилгээг өгсөн байх шаардлагатай. Шээсний шинжилгээ өгсөнөөс хойш  долоо хоног, цагаан хорхойн шинжилгээ өгсөнөөс хойш нэг сарын хугацаанд хүчинтэй байдаг.  Есдүгээр сарын 1-н дөхөхлээр  шинжилгээ өгөх иргэдийн дараалал үүсч ачаалал ихэсдэг тул цагаан хорхойн шинжилгээг  наймдугаар сарын 13-аас доорх цагийн хуваарийн дагуу авч эхэлсэн. Иргэд БОЭТ-д үнэ төлбөргүй, “Онош” лаборатори, “Талын булаг” эмнэлэгийн лаборатори, “Эрдэнэт” сувиллын цогцолбор, “Медипас “төв эмнэлэгт 2000-3000 төгрөгийн төлбөртэйгөөр наймдугаар сарын 31-ийг хүртэл цагаан хорхойн шинжилгээг  өгөх боломжтой. БОЭТ-д шинжилгээ өгөхийн тулд харьяа өрхийн эрүүл мэндийн төвөөс “Цагаан хорхой илрүүлэх” гэсэн илгээх бичиг авах бөгөөд бусад лабораториудад өрхийн эрүүл мэндийн төвөөс бичиг авах шаардлагагүй. Хэрэв 2018 оны зургаадугаар сарын 1-ээс хойш цусан суулга өвчнөөр өвдсөн тохиолдолд хүүхдийн өтгөнд эмгэг төрөгч илрүүлэх шинжилгээг цагаан хорхойн шинжилгээтэй хамт өгөх юм. Хепатит   А өвчний эсрэг дархлаажуулалтын 1, 2 дугаар тунд бүрэн хамрагдсан хүүхдүүд шээсний шинжилгээ өгөх шаардлагагүй.  Эцэг эхчүүд цагаан хорхойн шинжилгээний хариу болон вакцины карт, /Эх хүүхдийн ягаан дэвтэр/ -ээ цэцэрлэгийн эмчид шалгуулж бүртгүүлнэ. Хэрэв хепатит  А өвчний дархлаажуулалтад бүрэн хамрагдаагүй болон хоцорсон бол дархлаажуулалтад нөхөн хамрагдаж, шээсний шинжилгээг өгсөнөөр цэцэрлэгт элсэх юм. Шээсний шинжилгээг  Өрхийн эрүүл мэндийн төвүүд болон “Онош” лаборатори, “Талын булаг” эмнэлэгийн лаборатори, “Эрдэнэт” сувиллын цогцолбор, “Медипас” төв эмнэлэгт 1500-2500 төгрөгөөр авч байна. Дээрх зааврын дагуу шинжилгээнд хамрагдсан бол өрхийн эрүүл мэндийн төвөөс “Эрүүл бойжиж байгаа” гэсэн бичиг авах шаардлагагүй ажээ. [sgmb id="1"]