Баян-Өндөр сумын Цагаанчулуут багт аймаг, орон нутгийн төсвийн хөрөнгө оруулалт болох бараг 2 тэрбум төгрөгөөр 280 хүүхдийн хүчин чадалтай цэцэрлэг шинээр барьсан. Өнгөрөгч хавар бараг бэлэн болсон цэцэрлэгт ус, дулааны шугаманд нь туршилт хийх гэж байгаа гээд нэг хэсэг бүр тодруулбал, зургаадугаар сарын 1-нийг өнгөртөл хүлээн авах гэж бөөн асуудал болж байсан. Гэтэл цаана нь Цагаанчулуут, Рашаант багийн эцэг эхчүүд гэлтгүй хүүхдүүд цэцэрлэгт орно гэж тэсэн ядан хүлээж байсан шинэ цэцэрлэг өнөөдөр ч гэсэн асуудалтай хэвээр байна. Улсын комисс нь хүлээгээд авчихсан энэ цэцэрлэгийн хувьд есдүгээр сарын 1-нд хүүхдээ хүлээн авахад эргэлзээтэй байгаа бололтой. Өнгөрөгч хавар улсын комисс ажиллаж хүлээн авсан цэцэрлэгт энэ зуны борооны ус нэвтэрч анги танхим усанд автаж, явган хүний зам нь хууларч, жийргэвчнүүд нь суларсан талаар аймгийн ИТХ-ын Тэргүүлэгчдийн хуралдаан дээр яригдаж байна. Орхон аймгийн татвар төлөгчдийн олон зуун сая төгрөгөөр боссон, улсын комисс хүлээн авсан гэх энэ цэцэрлэгийн өнөөдрийн байгаа байдалд хэн буруутай болох улсын комисс ажиллаж хүлээн авсан гэх цэцэрлэгийн барилгад яагаад ус нэвтэрч байгаад хариуцах эзэн байгаа эсэхийг аймгийн ИТХ-ын дарга П.Пүрэвлхагва асуусан юм. Хот байгуулалт, барилга захиалагчийн албаны дарга Б.Мөнхдалай “Уг нь улсын комисс ажиллаад хүлээгээд авчихсан ш дээ” гэснээр өөр хариулт энэ удаад гарсангүй. Нэг их удахгүй Цагаанчулуутын шинэ цэцэрлэгт засвар хийнэ гэсэн мэдээ дуулдвал гайхах хэрэг алга. Хоёр тэрбум шахам төгрөгөөр 280 хүүхдийн ганц гайгүй цэцэрлэгтэй болох гэсэн эрдэнэтчүүдийн мөрөөдөл дээр хэн “мөнгө хийгээд” байгааг хянаж шалгадаг газар манай аймагт алга байна. [sgmb id="1"]