Ардын хувьсгалын дараахан их Д.Нацагдорж Монголчууддаа хандан боловсон эмнэлгийг сурталчлах зорилгоор “Эрүүл явбал улсын наадам үзнэ” хэмээх шүлгээ тэрлэж байсан түүхтэй. Тэгээд ч их зохиолчийн энэ үг өнөөдөр бидний дунд зүйр цэцэг үг болтлоо нэвтэрч, дэлгэрсэн. Тэгвэл энэ зуунд “Шүд эрүүл бол бие эрүүл” хэмээн эмч нар зөвлөдөг. Үнэхээр эрүүл шүдтэй хүн л эрүүл байж  чадах энэ цагт Эрдэнэтийн хүүхэд багачуул, ахмад настнуудын шүдний асуудалд Солонгосчууд анхаарлаа хандуулж эхэллээ. Эрдэнэт хотын гэр хорооллын найман газарт БНСУ-ын 100 хувийн хөрөнгө оруулалтаар баригдах хүүхэд багачуул, ахмад настнуудад зориулсан шүдний эмнэлгийн тоног төхөөрөмж наадмын өдрүүдээр ирсэн байна. Эхний эмнэлгийг “ББ парк” хотхонд байгуулахаар ажил нь эхэлжээ. Эрдэнэтийн хүүхэд багачуул, ахмад настнуудын төлөөх хариу нэхдэггүй энэхүү буянтай ажлыг Засгийн газрын Хэрэг эрхлэх газрын дэд дарга Б.Бат-Эрдэнийн тэргүүлдэг “Эрдэнэт хотын хөгжил, бодлого судалгааны хүрээлэн” ТББ-аас санаачлан хэрэгжүүлж байгаа аж. Энэхүү ажил биеллээ олсноор ирэх жилийн наадмаар “Эрүүл шүдтэй хүн Эрдэнэтийн наадам үзнэ” гэх яриа гарахыг ч үгүйсгэх аргагүй.  Зарим аймаг, орон нутгийн хувьд хүүхэд багачуудынхаа шүдний асуудлыг шийдэхийн тулд төсөвтөө  тодорхой хэмжээний хөрөнгө, мөнгө суулгах гэж үйлээ үздэг тал бий. Бүр зарим нэг нь Олон улсын байгууллагад “манай хүүхдүүдийн шүдийг эмчилж өгөөч ” гэж  хандсан тохиолдол ч байдаг. Тэгвэл БНСУ-ын 100 хувийн хөрөнгө оруулалтаар гэр хорооллын нутаг дэвсгэрт байгуулагдах найман шүдний эмнэлэг эрдэнэтчүүдийн хувьд шүд цооролт, шүд хорхой идэх зэргээс эхлэн олон асуудлыг ор мөргүй шийдэх боломжийг олгож байна. [sgmb id="1"]