Аймгийн баяр наадмын үеэр “Эрдэнэт үйлдвэр” ХХК-ийн 49 хувийг эзэмшигч “Монголын зэс корпораци” ХХК-ийн гүйцэтгэх захирал Ц.Пүрэвтүвшингийн баяр наадмын талаарх сэтгэгдлийг уншигчиддаа хүргэж байна. Баяр наадмын сэтгэгдлээсээ хуваалцана уу, “Монголын зэс” корпорацийн хувьд баяр наадмаа ямар амжилтаар угтаж байна вэ? - Орхон аймгийн баяр наадам нар, хур тэгширсэн сайхан болж байна. Орхон аймгийн баяр наадамд бид хоёр дахь удаагаа оролцож байна. Энэ жилийн хувьд Эрдэнэт үйлдвэрийн маань түүхт 40 жилийн ой тохиож байгаа. Үйлдвэр маань 100 хувь Монголын, Монгол улсын компани болсны хоёр жилийн ой энэ өдрүүдэд тохиолоо. Өнгөрсөн нэг жилийн хугацаанд Эрдэнэт үйлдвэр түүхэндээ байгаагүй өндөр амжилттай ажилласан нь уурхайчдын, орхончуудын хувьд баяртай үйл явдал боллоо. Энэ амжилт бол Орхон аймаг, Эрдэнэт хотын ард иргэдийн хүчин чармайлтын үр дүн байсан гэж "Монголын зэс" корпорацийн хувьд дүгнэж байгаа. Орхончуудтайгаа баяр наадмаа хамт тэмдэглэж байгаадаа үнэхээр сэтгэл хангалуун байна. -Наадамчиддаа хандаж баярын мэндчилгээ дэвшүүлнэ үү? - Зууны манлай бүтээн байгуулалт болсон Эрдэнэт үйлдвэрийг тойрсон Эрдэнэт хот болоод эрдэнэтчүүд маань хэдэн арван жилийн турш Монголын эдийн засаг болоод соёл урлагийн хөгжилд үнэтэй хувь нэмэр оруулж ирсэн бүтээлч ард түмэн билээ. Өнөөдрийн байдлаар энэ үйлдвэрээс таван хөдөлмөрийн баатар төржээ. Аймгийн  хэмжээнд ярьвал зургаа, долоон Хөдөлмөрийн баатар төрөн гарчээ. Миний сонссоноор Хөдөлмөрийн баатрын тоогоороо Орхон аймаг улсдаа дээгүүрт орох үзүүлэлттэй гэж ойлгож байгаа. Ийм мундаг, хөдөлмөрч, бүтээлч хамт олон болох Орхончуудынхаа хамт түүхт ойн баяр наадмаа тэмдэглэж байгаадаа миний бие, компанийнхаа нэрийн өмнөөс машид талархаж, та бүхэндээ сайхан наадаарай гэж чинь сэтгэлээсээ хүсэн ерөөе.                  [sgmb id="1"]