Зууны манлай бүтээн байгуулалт “Эрдэнэт үйлдвэр” ХХК-ийн үе үеийн уурхайчдын гавьяа зүтгэлийг Монголын төр, засаг цаг ямагт өндрөөр үнэлж эрдэнэсийн эзэд болсон уурхайчдыг шагнаж урамшуулдаг билээ.     Тулгар төрийн 2227 жил, Их Монгол Улс байгуулагдсаны 812 жил, Үндэсний эрх чөлөө, тусгаар тогтнолоо сэргээн мандуулсны 107 жил, Ардын хувьсгалын 97 жил, Ардчилсан хувьсгалын 29 жил, Үндэсний их баяр наадмыг тохиолдуулан Монгол Улсын Ерөнхийлөгч Х.Баттулгын зарлигаар Эрдэнэтийн уурхайчдаас хөдөлмөрийн баатар нэг, гавьяат цолтон гурав төрөн гарлаа. Монгол Улсын эдийн засаг болон Уул уурхайн салбарт өндөр хувь нэмэр оруулсан Уулын баяжуулах “Эрдэнэт” үйлдвэрийн мянга мянган ажилтнуудын төлөөлөл болгож, эрхэлсэн ажилдаа олон жил үр бүтээл, идэвхи зүтгэлтэй ажиллаж ирсэн “Эрдэнэт” үйлдвэр ХХК-ийн өрмийн машинч Батхүүгийн Батбаяр  Монгол Улсын хөдөлмөрийн баатар цол хүртээж, Хөдөлмөрийн баатрын алтан соёмбо тэмдэг, Сүхбаатарын одонг нь Монгол Улсын Ерөнхийлөгч Х.Баттулгаас гардсанаар хөдөлмөрийн баатруудын алдрын замнал үргэлжилсэн билээ. Мөн Эрдэнэт үйлдвэрийн анхдагч, Геологи хайгуулын ангийн ахмад ажилтан, Төрийн соёрхолт Г.Сандуйжав, Баяжуулах үйлдвэрийн Засварын хэсгийн тоног төхөөрөмжийн засварчин Э.Доржболд, Авто тээврийн байгууллагын Уулын технологийн тээврийн хэсгийн дарга Д.Чадраабал нар Аж үйлдвэрийн гавьяат ажилтан цолоор шагнагдсанаар “Эрдэнэт үйлдвэр” ХХК-ийн үе үеийн уурхайчин гавьяатуудын  үргэлжлэл болж байна. Үе үеийн уурхайчдын суу алдар Монгол наадмын цэнхэр төнгэр дор мандан бадрах болтугай. [sgmb id="1"]