1978 оны арванхоёрдугаар сарын 14-ний өдөр “Эрдэнэт үйлдвэр” ХХК-ийн анхны зэсийн баяжмал илчит тэргэнд ачигдан дэлхийн зах зээлд Эрдэнэтийн зэс нэрээр гарч эхэлсэн тэр цагаас хойш эдүгээ 40 жил өнгөрчээ. Одоогоос 40 жилийн тэртээх өдрүүдэд жилдээ 4 сая тонн хүдэр баяжуулах үйлдвэр Алтантэвшийн хөндийн хүнгэнэж Монгол орон хорьдугаар зууны түүхэндээ хамгийн том хүнд үйлдвэрээ ашиглалтад хүлээн авч байсан тэр цагийн үнэн түүхийн талаар ахмад уурхайчид хууч хөөрч, залуу халуун насныхаа тухай, үеийн олон найз нөхдөө эрж сураглан, цагаасаа өмнө бурхны орныг зорьсон зарим нөхдөө үгүйлж аньсага нь чийгтсэн одонгоо зүүсэн ахмадууд өнөөдөр Эрдэнэт хотыг төдийгүй эх орныг минь чимж байна. “Эрдэнэт үйлдвэр” ХХК-ийн түүхт 40 жилийн ойн баярын хүрээнд үйлдвэрийн цех, тасаг, нэгжийн ажилтнууд, ахмадууд оролцсон “Бид эрдэнэсийн эзэд” баярын жагсаал Амарын талбайд боллоо. Тус үйлдвэрийн олон арван цех, тасгуудын өөр өөрсдийн онцлог өнгө төрхийг илтгэсэн жагсаал Эрдэнэт хотыг чимж, эрдэнэтчүүд ойрын хэдэн жилдээ л үзээгүй сүрлэг, сүр жавхаатай парадыг чимээ, дуулиан татрахгүй цуурайтаж байна. ”Бид эрдэнэсийн эзэд” баярын жагсаалд аймгийн ИТХ-ын Тэргүүлэгчдийн дарга П.Пүрэвлхагва, аймгийн Засаг дарга Д.Батлут, “Эрдэнэт үйлдвэр” ХХК-ийн Ерөнхий захирал, аж үйлдвэрийн гавьяат ажилтан Х.Бадамсүрэн, тус үйлдвэрийн ТУЗ-ийн дарга Б.Бямбасүрэн, үйлдвэрийн 49 хувийг эзэмшигч “Монгорлын зэс” корпорацийн  ТУЗ-ийн дарга Д.Мөнхбаатар, компанийн захирал П.Пүрэвтөвшин тэргүүтэй хүндэт зочид оролцов. [sgmb id="1"]