Аймгийн ИТХ-ын Тэргүүлэгчдийн ээлжит 9 дүгээр хуралдаанаар “Аймгийн 2018-2019 оны өвөлжилтийн бэлтгэл ажлын төлөвлөгөө батлах” тухай асуудлыг хэлэлцсэн. Энэ үеэр тэргүүлэгч Д.Эрдэнэбат: “Өвөлжилтийн бэлтгэл ажлын хүрээнд орон сууцны байрнуудын нэг давхарын подвалуудын халдваргүйжүүлэлт, ариутгалын ажил ямар шатанд явдаг вэ. Мэргэжлийн байгууллагууд төдийгүй Эрдэнэт ус, СӨХ-ийнхөн энэ тал дээр ямар ажил зохиодог вэ” хэмээн асуусан юм. Д.Эрдэнэбатын асуултад “Эрдэнэт ус, дулаан түгээх сүлжээ” ОНӨҮГ-ын ерөнхий инженер Ч.Мягмарсүрэн “Энд би ажилчдынхаа өмнөөс нэг зүйл хэлье. Орон сууцны нэг давхарт нохой бөөс маш их бий. Мэргэжлийн байгууллагуудад хэлэхэд хүлээж авдаггүй. Манай ажилчид нохой бөөсөнд байнга хазуулдаг. Тэр нь загатнадаг учраас мааждаг. Их хэцүү. СӨХ-оос нохой бөөсний устгалтад анхаардаггүй” гэсэн юм. Үүний дараа аймгийн СӨХ-дын дарга Ц.Ганхуяг “Эрдэнэт усын ажилчид подвалд ороод ажиллахад нь нохой бөөс хазаад түүнийгээ маажиж малтаад яр шарх болсон зүйл байхгүй. Ийм мэдээлэл өгсөн гээд байгаа хэсгийн инженертэй нь уулзахад миний гарын үсэг биш байна. Би ийм санал гомдол гаргаагүй  гэсэн хариулт өгсөн. СӨХ-дын зүгээс энэ онд 18  сая төгрөгөөр ариутгал, халдваргүйжүүлэлт хийхээр төлөвлөсөн. Халдваргүйжүүлэлтийг мэргэжлийн байгууллага, мал эмнэлгүүдээр хийлгэж байгаа. Одоо нохой бөөс байхгүй. Эрдэнэт усынхан ченжийн ажил хийдэг. СӨХ-д боолын үүрэг гүйцэтгэдэг. Сангийн нэг ширхэг винтель захаас 8500 төгрөгөөр худалдан авдаг. Түүнийг мэргэжлийн байгууллага болох Эрдэнэт усаар тавиулахаар хөлс нь 10 гаруй мянган төгрөг болдог. Эрдэнэт усынхан ингэж л ажилладаг. Эдний ажилчид нохой бөөсөнд хазуулаад яр шархандаа баригдсан асуудал болоогүй” гэсэн юм. Энэ хоёр байгууллагын удирдлагуудаас өгч байгаа тайлбарыг харвал ямар ч байсан манай Эрдэнэт хотын байрны подвал нохой бөөстэй. Түүнийг устгадаг юм байна гэсэн ойлголт төрлөө. Гэхдээ энэ хоёр байгууллагын ажилчдын хэн нь нохой бөөсөнд хазуулаад яр шархандаа баригдаад байгааг хууль хяналтынхан тогтоохгүй бол нэг нь танайх нохой бөөстэй гээд, нөгөө нь нохой бөөсөө устгасан хэмээн барьцалдах дээрээ тулаад байна, дарга нар аа. https://www.youtube.com/watch?v=ascdBVOkN4Y&feature=youtu.be [sgmb id="1"]