Энэ амралтын өдөр буюу 5-р сарын 19, 20-ны өдрүүдэд Долоон бурхан одны тахилга, Баян-Өндөр хайрхны тахилга болно. Долоон бурхан од, овоо тахих дэг журмын дагуу сүсэгтэн олон өргөл барьцаа барьж, долоон эрдэнэ, найман тахил залах ёслол болох юм. Баян-Өндөр хайрхны тахилгад аймгийн Онцгой байдлын газар, Бүсийн оношилгоо эмчилгээний төв, Хот тохижуулах газрынхан бие бүрэлдхүүнээрээ ажиллана. 2011 онд Баян-Өндөр хайрхныг тахиснаас хойш долоон жилийн дараа тахих ёслол хийж байна.  Тавдугаар сарын 19-ны 22.00 цагаас эхлэн 23.30 цаг хүртэл Долоон бурхан одыг тахих юм.  Долоон бурхан од тахих ёслол дууссаны дараа иргэдэд нийтийн тээврээр үйлчилнэ. Харин ням гарагийн өглөө 06.00 цагаас Баян-Өндөр хайрхныг тахих үйл ажиллагаа эхэлнэ. Орхон аймгийн гандан хийдийн 60 гаруй лам ном хурах юм. Овоо тахих дэг журмын дагуу сүсэгтэн олон өргөл барьцаа барьж, долоон эрдэнэ, найман тахилыг зална. Долоон бурхан одыг эртнээс тахих дэг жаягтай байсаар иржээ. Долоон бурхан одонд сүү өргөдөг уламжлалтай. Тахилгын тухай эрдэмтдийн гаргасан номонд од тус бүрт бурхдыг байршуулан,  тахих уншлага ном ч ялгаатай байдаг. Долоон бурхан одны тахилга, Баян-Өндөр  хайрхны тахилгад хүний амь нас гуйн залбирч болдоггүй. Цагаан сүүгээ өргөн нийт зон олны сайн сайхны төлөө залбирах учиртайг лам нар тайлбарлалаа. Тавдугаар сарын 20-ны өглөө уншлагын зал үйлээр Баян-Өндөр хайрхны тахилга эхэлнэ. Тахилгын үеэр сүсэгтэн олон сүү, тариа будаанаас өөр зүйл авчралгүй, байгаль орчиндоо хог хаяхгүй байхыг зохион байгуулагчдын зүгээс уриалж байна.  Тахилгад оролцох иргэд овоо тахилгыг тахих ёслолд ухамсартай оролцож, архи тамхи хэрэглэхгүй байх, сэтгэлээсээ хандахыг сүсэгтэн олонд сануулж байна.   [sgmb id="1"][sgmb id="1"]