Аймгийн ИТХ-ын Тэргүүлэгчдийн ээлжит наймдугаар хуралдаан өнөөдөр боллоо. Энэ удаагийн хуралдаанаар Баян-Өндөр суманд Малчин баг, Малчны хороо байгуулах шийдвэрийг аймгийн ИТХ-ын Тэргүүлэгчид дэмжиж нэгдсэн хуралдаанд оруулахаар болов. Булган аймгийн төвөөс баруун тийш нэг их холгүй Буриадын хороо гэж байдаг. Улаанбаатарт нисэхийн уулзвараас урагш Өлзийт хороо гэж бий. Түүн шиг Баян-Өндөр сум Малчны хороотой болох нь ээ. Түүнээс өмнө мал, малчдад төрийн үйлчилгээг хүргэх, тэдэнд хүрч үйлчлэхийн тулд анхан шатны нэгж болох Малчин багийг байгуулах тухай саналыг аймгийн Засаг даргын мөрийн хөтөлбөр, 2017-2020 онд аймаг, орон нутгийг хөгжүүлэх Үндсэн чиглэлд туссаны дагуу эрх баригчид Баян-Өндөр суманд Малчин багийг шинээр байгуулах тухай асуудлыг хэлэлцсэн. 1998 онд аймгийн ИТХ-ын 9 дүгээр хурлаас Малчин баг байгуулах шийдвэрийг анх гаргаж байжээ. Харин 2014 оны аймгийн ИТХ-ын есдүгээр хуралдаанаас Баян-Өндөр сумын Малчин багийг Жаргалант суманд шилжүүлэх шийдвэр гаргаж байсан удаатай. Түүнээс хойш яг нэг жилийн дараа буюу 2015 оны аймгийн ИТХ-ын наймдугаар хуралдаанаас Жаргалант сумын Малчин багийг татан буулгаж, газрын хөрснөөс арчиж мал, малчин хоёрыг зөнд нь хаясан, АН-ынхан. Тухайн үеийн энэ шийдвэрийн шалтгаан нь албан бусаар бол малчид хэзээ ч АН-ыг дэмждэггүй учраас Малчин багийг тарааж хариугаа авч буйгаар тайлбарлагддаг. Өнөөгийн эрх баригчид 2016 оны долоодугаар сард засгийн эрхийг авангуутаа мөрийн хөтөлбөрт туссан Малчин баг байгуулах тухай ажлыг анхаарлаасаа хөндий байлгаагүй. Иргэдээс тэр дундаа малчдаас санал авахад тэдний 88.1 хувь нь Малчин баг байгуулах саналыг дэмжсэн байна. Ингээд энэ удаад тэргүүлэгчид аймгийн ЗДТГ-аас оруулж ирсэн Малчин баг байгуулах тухай асуудлыг хэлэлцээд дэмжиж нэгдсэн хуралдаанд оруулахаар болов.[sgmb id="1"]