Аймгийн ИТХ-ын Тэргүүлэгчдийн дөрөвдүгээр сарын 12-ны өдрийн хурлаар “Төрөөс хүнс, хөдөө аж ахуйн талаар баримтлах бодлогыг хэрэгжүүлэх аймгийн дэд хөтөлбөр”-ийн хэрэгжилтийн явц байдлын тухай асуудлыг авч хэлэлцсэн. Энэ үеэр аймгийн ИТХ-ын Тэргүүлэгч Д.Батбилэг Жаргалант сумын ногоочдын тарьсан ногооны чанарын талаар болон тус сумын малын эрүүл ахуйн талаар өөрийн байр суурийг илэрхийлсэн юм. Тэрбээр “Жаргалант сумын малын махыг хүнсний хэрэгцээнд хэрэглэхэд үнэхээр хүндрэлтэй. Нядлаад дотор гэдсийг нь гаргаад үзэхэд уушиг нь тэр чигээрээ устчихсан байдаг. Би өөрөө хувийн сүүний үйлдвэр ажиллуулж байсан. Үнээний сүү нь тараг болж бүрэлддэггүй ш дээ, Бат-Өлзий дарга аа. Та бүхний танилцуулаад байгаа тэр шинжилгээний хариу чинь иргэд мах, сүүг нь хэрэглэж болно гэж гарсан нь үнэн юм бол тэдэнд хүргэ л дээ, Хүнс хөдөө аж ахуйн газар аа. Та бүхний тайлангаас харвал мах, сүүг нь хэрэглэж болно гэж гарсан юм бол иргэддээ хүргэ, энэ мэдээллээ. Дээр нь танайхаас дээж авч боловсруулдаг лабораторийн асуудал байнга яригддаг. Энэ лаборатоирд хийсэн шинжилгээнийхээ хариуг хэвлэл мэдээллээр ил болго л доо. Өнөөдөр Эрдэнэтийн хувьд хүнсний аюулгүй байдал хамгийн чухал асуудал. Мал аж ахуй, газар тариалан бас ч гэж учиртай. Бидний идэж ууж байгаа зүйл аюулгүй юу гэдэг нь нэн тэргүүнд тавигдах ёстой. Өнөөдөр Монгол улсын хэмжээнд хүнсний аюулгүй байдал хамгийн эн тэргүүнд тавигдаж байгаа. Эрдэнэтийн иргэдийн хувьд хүнсний аюулгүй байдал нэг номерийн асуудал байх ёстой. Энэ тал дээр та бүхэн анхаарч ажиллах ёстой гэж бодож байна” хэмээсэн юм.  Тэргүүлэгчдийн хурал болсноос хойш багагүй хугацаа өнгөрч байгаа ч аймгийн Хүнс, хөдөө аж ахуйн газраас энэ талаарх мэдээллийг иргэдэд хүргээгүй л байна. [sgmb id="1"]