Аймгийн ИТХ-ын Тэргүүлэгчдийн хурал болов. Энэ удаад Тэргүүлэгчид нэр бүхий найман асуудлыг авч хэлэлцсэний нэг нь “Журамд өөрчлөлт оруулах тухай” байлаа. Аймгийн ИТХ-ын дэргэд Гэмт хэргээс урьдчилан сэргийлэх ажлыг зохицуулах зөвлөл /ГХУСАЗЗ/ ажилладаг. Тус зөвлөлөөс журам гаргаж түүндээ аймгийн хэмжээнд шөнийн 00.00 цагаас хойш ресторан, караоке баар, шөнийн дэлгүүр ажиллуулж болно хэмээн зааж түүнийгээ аймгийн ИТХ-ын хурлаар оруулж батлуулсан. Энэ үйл явдал өнгөрсөн оны сүүлчээр өрнөж улмаар аймгийн хэмжээнд дээрх нэр бүхий газруудаар архи худалдаалдаг болсноор цахим орчинд шүүмжлэл өрнөсөн. Үүнээс улбаалаад аймгийн ИТХ-ын дэргэдэх ГХУСАЗЗ-өөс журманд өөрчлөлт оруулах саналыг Тэргүүлэгчдийн хуралдаанд оруулсан. Улмаар Тэргүүлэгчид хэлэлцээд баар, ресторан, шөнийн дэлгүүрийн ажиллах цагийн хуваарьт өөрчлөлт оруулах асуудлыг аймгийн ИТХ-ын хуралдаанаар оруулах шийдвэр гаргалаа. Харин аймгийн Засаг дарга Д.Батлутын зүгээс ресторан, караоке баарны шөнийн 03.00 цаг хүртэл ажиллах цагийн хуваарийг өөрчилж хуучнаар нь болгох саналыг дэмжжээ. Харин урин дулаан цаг ирж манай аймгийг дайран өнгөрч байгаа гадна дотны иргэд цэвэр ус ч худалдан авах боломжгүй байгаа байдлыг харгалзан шөнийн дэлгүүрийг хэвээр нь ажиллуулах саналаа ирүүлжээ. Өнөөдөр зарим нэг албан ёсны мэдээллээс харвал цагаан сарын өмнөөс рестораны шөнийн цагийн хуваарьт хязгаарлалт хийсэн гэж байгаа ч тэр нь бодит байдалтай төдийлөн нийцэхгүй байлаа. Зарим нэг тэргүүлэгчийн хувьд “Манай аймаг өөрийн гэсэн онцлогтой. Эрдэнэт үйлдвэрийн ажилчид өглөө эрт ажилдаа гардаг тул орой эртхэн унтдаг. Тиймээс шөнийн цагаар архи, согтууруулах ундаа зарах нь утгагүй. Зөвшөөрлийг нь цуцлая” хэмээн саналаа гаргаж байлаа. Ямар ч байсан аймгийн ИТХ-ын хуралдаанаар шөнийн 00.00 цагаас хойш архи, согтууруулах ундаагаар үйлчлэх эсэх асуудлыг шийдэхээр боллоо.