Аймгийн Засаг даргын шуурхай зөвлөгөөнөөр энэ сарын 15-ны өдөр Жаргалант суманд малын гоц халдварт шүлхий өвчин гарсантай холбогдуулан холбогдох албаны удирдлагууд цаг үеийн нөхцөл байдлыг танилцууллаа. Жаргалант суманд голомтын бүсэд 127 айл өрхийн 2072 толгой мал өвөлжиж байна. Хүнс, хөдөө аж ахуйн газрын Мал эмнэлгийн газраас хувийн мал эмнэлгүүдтэй хамтран вакцинжуулалтын ажлыг хийж эхэллээ. Сэжигтэй бүсэд багтах 103 айл өрхийн 1888 малыг вакцинд хамруулжээ. Үүний зэрэгцээ журмын дагуу хамгаалалтын бүс дэх 52 өрхийн 800 гаруй толгой малыг вакцинжуулсан байна. Ирэх долоо хоногт хоёрдугаар ээлжийн вакцинжуулах ажлыг хийж дуусгана гэж албаны хүн мэдээллээ. Баян-Өндөр сумын Говил, Баянцагаан багуудыг хорио цээрийн хамгаалалтын бүсэд орууллаа.      Энэ багуудад нийт 300 үхрийг шинжилгээнд хамруулсан, одоогоор өвчний шинж тэмдэг илрээгүй байна. Аймгийн Засаг даргын зүгээс баруун талын постууд дээр онц анхааралтай ажиллахыг холбогдох албаныханд үүрэг болголоо. Учир нь Булган аймгийн  төв болон Бугат, Хангал, Халиун, Сэлэнгэ суманд шүлхий өвчний шинж тэмдэг илрээд байгаа. Шүлхий өвчний нян тээгч нь хүн, малын хөдөлгөөнөөр дамжих магадлал өндөр байдаг. Мөн Хөвсгөл аймагт гуравдугаар сарын 2-5-ны хооронд болох “Мөсний баяр”-т оролцох иргэдийн хөдөлгөөнд хяналт тавихыг үүрэг болголоо. Дээрхтэй холбоотой иргэний шилжилт хөдөлгөөнд хязгаарлалт тавих шаардлагатай гэж аймгийн Засаг дарга онцолж байлаа. Мөн онц шаардлагатай газруудад нэмэлт пост гарган ажиллуулахыг үүрэг болгожээ. [sgmb id="1"]