Уламжлалт сар шинийн баяр болж байгаатай холбогдуулан Аймгийн ИТХ-ын дарга П.Пүрэвлхагва санаачлан Гандан хийдийн хамба, тэргүүн лам нарыг хүлээн авч уулзав. Уулзалтанд Хутагт ламын “Ганданшаддүвлин” хийдийн хамба лам Ж.Ширнэн, “Төгсбуянт” хийдийн хамба лам О.Гэрэлтбаяр, “Гончигсүмлэн” хийдийн хамба лам А.Гурван-Эрдэнэ, “Дээдийн номын хур” буяны дуганы лам М.Азтай, “Жалданжанчүвлин хийд”-ийн хамба лам Б.Мөнхтогоо, “Мөнхийн зул” хийдийн лам Н.Ганзориг, “Бал Сажа Лэгшад Норовлин” хийдийн хамба лам Л.Дашхүү, “Очир” хийдийн тэргүүн Р.Чулуут нар оролцсон юм. Цагаан сарын баяр нь өвөг дээдсийн үеэс уламжлан ирсэн ахас дээдсээ хүндлэн, өргөн олноороо тэмдэглэн өнгөрүүлдэг төрт ёсны хамгийн том баяр билээ. Харин орчин цагт бидний монголчууд уламжлалт сар шинийн баяраар эд хөрөнгөөрөө баярхах, гайхуулах, хэт их үрэлгэн тансаг буюу эдийн засгийн байдлаараа бие биенийхээ дээр гарах гэсэн чиг хандлагууд түлхүү ноёлох болж. Тиймээс сар шинийн баяраа өв уламжлалаа дээдлэн сайн сайхныг билэгдэж, орчин цаг үетэйгээ нийцүүлэн тэмдэглэн өнгөрүүлэхийг Аймгийн ИТХ-даргын зүгээс уриалсан юм. Үүнтэй холбогдуулан Гандан хийдийн хамба лам нар маань хуран цуглаж  Монголын уламжлалт цагаан сарын баярыг эрт дээр үеэс хэрхэн тэмдэглэж ирсэн, “тийн ялгуугч” хэмээх нохой жилийн өнгийг хэрхэн тодорхойлсон, засал ном, зүг чиг мөрөө хэрхэн яаж гаргах тухай мэдээллийг өглөө. П.Пүрэвлхагва даргын зүгээс энэ жилээс эхлэн аймгийн хэмжээнд үйл ажиллагаагаа явуулж байгаа бүх сүм хийдүүд нэгдэн сүсэгтэн олонд зориулан “Мандал өргөх” ёслолыг цагаан сарын шинийн нэгний өглөө зохион байгуулж байх уриалга гаргасан юм. Буддын шашны найман хийдийн хамба лам нар аймгийн ИТХ-ын даргын энэхүү уриалгыг дэмжин “Мандал өргөх” номын ёслолоо Цагаан сарын шинийн нэгний өглөө 07.00 цагт “Бурхан багш”-ийн цогцолбор, “Жалданжанчүвлин” хийдэд нэгдэн, хамтарч хийхээр боллоо. [sgmb id="1"]