Аймгийн ИТХ түүний дэргэдэх Эрх зүй, нутгийн удирдлагын хөгжлийн хорооноос санаачлан аймгийн ЗДТГ-тай хамтран “Хөгжлийн түүчээ-хүний хөгжил Төлөөлөгчийн нэг өдөр” сэдэвт ажил төлөвлөгөөний дагуу хоёрдугаар сарын 10-нд Наран, 11-нд Бүрэнбүст багт зохион байгуулсан. Харин ням гарагт Жаргалант суманд тус аян үргэлжиллээ. Өдөрлөгийг нээж аймгийн ИТХ-ын дарга П.Пүрэвлхагва Жаргалант сумын ард иргэдэд хандан үг хэлж мэндчиллээ. Мөн энэ үеэр ИТХ-ын даргын зүгээс “Хөгжлийн түүчээ–хүний хөгжил” сэдэвт энэхүү аяныг Жаргалант суманд албан ёсоор зохион байгуулах туг, тайлангийн хамт тус сумын удирдлагуудад хүлээлгэн өгөв. “Төлөөлөгчийн нэг өдөр” ажил нь төрийн үйлчилгээг иргэдэд ойртуулах, шуурхай, чанартай болгох, багийн үйл ажиллагааны чадавхийг бэхжүүлэх, иргэд багийн хоорондын харилцааг идэвхжүүлэн, иргэдийн хүсэлтийг шуурхай шийдвэрлэх зорилготой юм. Тус өдөрлөгт төрийн болон төрийн бус байгууллагууд оролцож. Төрийн үйлчилгээг иргэдэд нэг дороос шууд хүргэн ажиллав. Мөн үүний зэрэгцээ сар шиний баяр болох гэж байгаатай холбогдуулан хувиараа бизнес эрхлэгчид өөрсдийн бараа бүтээгдэхүүнээ сурталчлан таниулж байсан юм. Аймгийн ИТХ-ын Эрх зүй, нутгийн удирдлагын хөгжлийн хорооноос санаачлан аймгийн ЗДТГ, төрийн болон төрийн бус байгууллагуудтай хамтран Аймгийн энэ оны нэгдүгээр улирлыг “Үндэсний бахархал нутгийн хөгжил”, хоёрдугаар улирлыг “Эх дэлхий байгаль орчин эко Эрдэнэт”, гуравдугаар улирлыг “Өвөлжилтийн бэлтгэл”, дөрөвдүгээр улирлыг “Төрийн үйлчилгээний соёл” сэдвийн дор нэрэмжит аяныг зохион байгуулахаар төлөвлөжээ. [sgmb id="1"]