БНТурк улсаас Монгол Улсад суугаа Онц бөгөөд бүрэн эрхэт элчин сайд М.Ахмет Язал төвийн хэвлэлийнхэнд хандсан байна. Тэрбээр энэ үеэр “Олон улсад үйл ажиллагаа явуулж байгаа турк сургуулиудыг хаах, зарим сургуулийн боловсролын гэрчилгээ, диплом зэргийг хүлээн зөвшөөрөхгүй байх шийдвэрийг Туркийн эрх баригчид 2017 онд гаргасан байна. Энэ шийдвэр нь Монгол Улсад үйл ажиллагаа явуулж байгаа таван сургуульд хамаарна. Үүнд “Мон-Турк”, “Улаанбаатар Эмпати” болон Дархан-Уул, Орхон, Баян-Өлгий аймагт үйл ажиллагаа явуулж байгаа турк сургуулиуд багтсан” гэлээ. Гэхдээ хоёр орны хувьд дээрх сургуулийн төгсөгчдийг хохироохгүй байх тал дээр яриа, хэлэлцээ явуулж буйгаа ч мэдэгдсэн. Дээрх сургуулиудаас олгож буй гэрчилгээг зөвхөн Турк улсад хүлээн зөвшөөрөхгүй бусад улсад суралцах, ашиглах боломжтой. Харин Туркийн Засгийн газрын тэтгэлэгт хөтөлбөрт хамрагдах ямар ч боломжгүй ажээ. 2016 оны долоодугаар сард БНТурк улсад цэргийн эргэлт болох гэж байсныг Оросын тал мэдэгдсэнээр Ерөнхийлөгч Тайп Эрдоган бослогыг илрүүлэн дарж гэмтнүүдийг шүүхэд шилжүүлээд байгаа хэмээн олон улсад үзэж байгаа. Төрийн эргэлтийг удирдагч нь АНУ-д амьдардаг шашны номлогч Футулаа Гюлен гэж туркийн тал мэдэгдэж түүнийг эргүүлэн өгөхийг АНУ-аас шаардсан удаатай. Туркийн өнөөгийн эрх баригчдын үзэж буйгаар дээрх таван сургуульд ажиллаж байгаа багш нар нь Футулла Гюлентэй холбоотой, улмаар босогчдыг сурагчдын төлбөр хураамжаар санхүүжүүлдэг байсан. Босогчид олон улсад сургууль байгуулж боловсролын байгууллагаар дэмжуулан мөнгө олж байна гэх хардлагын улмаас ийм арга хэмжээ авч байгаа бололтой. Өнөөдөр “Орхон эмпати” сургууль нь жилдээ 3-6 сая төгрөгийн төлбөртэй. Англи хэл, тооны хичээлийг олон цагаар судалдаг. Гэхдээ ямар ч байсан БНТурк улсын Элчин сайдын мэдээллээс харвал өнгөрсөн жил тус сургуулийг төгссөн төгсөгчдийн гэрчилгээг тус улс хүлээн зөвшөөрөхгүй байгаа аж. Өнгөрсөн жилийн төгсөгчид үүний улмаас тус улсын Засгийн газрын тэтгэлэгт хөтөлбөрт хамрагдах боломжгүй болжээ. Цаашид дээрх таван сургуулийн хувьд оршин тогтнох асуудал ч анхаарлын төвд байна. [sgmb id="1"]