“Эрдэнэт үйлдвэр” компанийн Дулааны цахилгаан станцыг 48 мвт-аар өргөтгөж хүлээлгэн өгөх ёслол өнөөдөр болов. Нэг үгээр хэлбэл, энэ өдрөөс өмнө “Эрдэнэт үйлдвэр” цахилгаан  эрчим хүчний хувьд Монголын хамгийн том хэрэглэгч байсан бол одоо Монголын хэмжээнд эхний гуравт багтах үйлдвэрлэгч боллоо. Эрдэнэтийн гэлтгүй Монголын түүхэнд том үсгээр “ЭРДЭНЭТ ҮЙЛДВЭРИЙН ДУЛААНЫ ЦАХИЛГААНЫ СТАНЫГ 48 Мвт-аар ӨРГӨТГӨСӨН 2018 ОНЫ НЭГДҮГЭЭР САРЫН 22” хэмээн бичигдэх дурсгалт өдөр болж байна.Энэ үйлдвэрийн өргөтгөлийн ажил 2015 оны намар анхны гэрээг байгуулж, 2016 оны тавдугаар сард барилгын ажлын шаваа тавьж байлаа. Дулааны цахилгаан станцын өргөтгөл хугацаанаасаа хоёр сарын өмнө ийнхүү ашиглалтад орж байна. Энэ том төслийн ажлыг БНХАУ-ын Харбин хотын  “Харбин электрик интернешнл” компани гүйцэтгэсэн ажээ.         “Эрдэнэт үйлдвэр ХХК-ийн дулаан цахилгаан станц нь саяхныг хүртэл 2.5 Мвт-ын 2 ширхэг турбин ашиглаж байсан. Өргөтгөл хийсний үр дүнд тус бүр нь 12 Мвт-ын хүчин чадалтай дөрвөн турбин ашиглалтад орууллаа. Үүний үр дүнд хүчин чадал нь 53 Мвт болж өсч манай үйлдвэр цахилгаан эрчим хүчний хэрэглэгчээс, үйлдвэрлэгч болж байна” хэмээн үйлдвэрийн ерөнхий захирал Х.Бадамсүрэн онцлон хэллээ. Нээлтийн ёслолд оролцсон Эрчим хүчний сайд Ц.Даваасүрэн “Хүйтний улиралд манай эрчим хүчний систем бүх хүчин чадлаараа ажиллаж байгаа ч дутагдал үүсч байна. ОХУ-аас авдаг эрчим хүчний импортын хэмжээ өссөн. Ийм үед Эрдэнэт үйлдвэр 48 Мвт-ыг нэмж ашиглалтад оруулж байгаа нь сайн хэрэг” гэсэн юм. Нээлтийн ажиллагаанд УИХ-ын гишүүн, Эрчим хүчний сайд Ц.Даваасүрэн, БНХАУ-аас Монгол улсад суугаа Элчин сайдын яамны зөвлөх Ли Янжун, Засгийн газрын Хэрэг эрхлэх газрын дэд дарга, “Эрдэнэт үйлдвэр” ХХК-ийн ТУЗ-ийн дарга У.Бямбасүрэн болон “Харбин электрик интернешнл” компанийн гүйцэтгэх захирал Чү Ай Мин нарын зочид оролцов. [sgmb id="1"]