[sgmb id="1"] У.Хүрэлсүхийн тэргүүлсэн Засгийн газраас төрийн албан хаагчдад 300 мянган төгрөг олгохоор болсон. Төрийн албаны зөвлөлөөс улсын хэмжээнд 188.7 мянган төрийн албан хаагч байдаг тухай мэдээг гаргаад байгаа. Энэхүү 188.7 мянган төрийн албан хаагчаас 1.2 мянган орчим төрийн өндөр, дээд албан тушаалтан, шүүгч нарт 300 мянган төгрөгийн үр дүнгийн урамшууллыг олгохгүй хэмээсэн. Энэ долоо хоногийн эхээр Сангийн яамнаас нийслэлийн төрийн албан хаагчдын урамшууллын мөнгийг Төрийн сангийн дансандтөвлөрүүлсэн байна. Харин орон нутгийн албан хаагчдын мөнгийг тухайн орон нутгийн Төрийн санд шилжүүлжээ. Үүний дагуу төрийн байгууллагууд шинэ жилээс өмнө “Өвлийн өвгөний бэлэг” хэмээх төрийн албан хаагчийн урамшууллыг олгож дуусгах юм байна. УИХ-аас 2017 оны төсвийн тодотголд төрийн албан хаагчдад 55.6 тэрбум төгрөг төсөвлөж, нэг удаагийн мөнгөн тэтгэмж хэлбэрээр тус бүр нь 300 мянган төгрөг олгохоор болсон. Энэ мөнгийг зөвхөн 2017 онд төрийн албанд ажиллаж байгаа иргэдэд үр дүнгийн урамшуулал болгон өгөх юм. Урамшууллын мөнгөнөөс хувь хүний орлогын албан татвар 10 хувь, төрийн албан хаагчийн төлөх нийгмийн даатгалын шимтгэл 10 хувийг тус тус суутгана. Улс татвараа суутгаад үлдсэн 243 мянган төгрөгийг төрийн албан хаагчдын гар дээр олгох гэнэ. Харин сахилгын хариуцлага алдсан шийтгэлтэй, шийтгэлгүйд тооцогдох хугацаа нь дуусаагүй байгаа төрийн албан хаагчдад урамшууллын мөнгө олгохгүй ажээ. Журманд заасны дагуу 2017 онд жирэмсний амралттай байгаа албан хаагчдад олгохгүй гэнэ.