Өнгөрсөн долоо хоногийн баасан гарагт бүх нийтээр гудамж талбайн цас цэвэрлэх ажлыг Баян-Өндөр сум, Хот тохижуулах газраас зохион байгуулсан. Хотын цас мөс цэвэрлэх их цэвэрлэгээний ажилд тухайн өдөр нийтдээ 528 аж ахуйн нэгж, 1650 иргэн оролцож 36 мянга 792м2 талбайг цэвэрлэсэн аж. Гэтэл цас цэвэрлэгээний ажилд өөрөө бүү хэл албан байгууллагаа ч оролцуулаагүй төрийн байгууллагын дарга нарт хариуцлага тооцох эзэн өнөөдөртөө манай аймагт алга. Баян-Өндөр сум, Хот тохижуулах газар, Хотын захирагчийн албанаас цас цэвэрлэгээний үеэр хяналт шалгалт хийсэн байдаг. Хяналт, шалгалтаар Б.Анар даргатай Орхон аймгийн Нийгмийн даатгалын хэлтэс, Б.Батсүх захиралтай БОЭТ-ийнхөн нийтийн “субботник”-оос хойш суужээ. БОЭТ-ийнхэн цас цэвэрлэгээний ажлыг халтуурдахын тулд Хүүхдийн тасгийн эмч, сувилагч, асрагч нараа ажилд гаргасан тухай аймгийн Засаг даргын шуурхай дээр танилцуулав. [sgmb id="1"] Эрдэнэтчүүдийн хувьд хамгийн ихээр үйлчлүүлдэг байгууллагууд бол БОЭТ, Нийгмийн даатгалын хэлтэс. Холбогдох хууль тогтоомж, аймгийн Засаг даргын үүрэг даалгаварт зааснаар БОЭТ, Нийгмийн даатгалын хэлтсээр үйлчлүүлсэн иргэн тухайн байгууллагын хашаанд унаж гэмтсэн тохиолдолд хохирлоо Б.Анар, Б.Батсүх дарга нараас нэхэх эрхтэй юм байна. Энэ удаагийн цас цэвэрлэгээний ажилд хувийн хэвшлийнхэнээс “Хүрэнбулаг” ХХК, “ЦАХ маркет” худалдааны төв, “Очир төв"ХХК зэрэг байгууллага оролцоогүй байна. Даваа гарагийн шуурхай дээр аймгийн ЗДТГ-ын дарга Д.Соёлчхүү “Цас цэвэрлэх ажилд байгууллагууд нийгмийн хариуцлагаа дээшлүүлэх хэрэгтэй” гэсэн аман үүрэг өглөө. Харин цас цэвэрлэгээний ажилд байгууллагаа удирдан зохион байгуулж оролцуулаагүй Б.Анар, Б.Батсүх нарт ямар нэгэн хариуцлага тооцсонгүй толгойг нь илээд өнгөрөх нь тэр. Аймгийн Засаг дарга нь цас цэвэрлэх талаар үүрэг даалгавар өгөөд байхад дээрх нэр бүхий дарга нар өөрөө хүрз бариад гарах нь бүү хэл ажилтнуудаа ч нийтийг хамарсан ажилд оролцуулахгүй байгааг үүрэг даалгаварыг үл ойшоож байгаа гэж ойлгох уу аль эсвэл тэд “том толгой”-той болжээ гэж үзэх үү.