“Хөгжлийн бэрхшээлтэй иргэдийн эрх”-ийг хамгаалах сарын аяны хүрээнд “Нийтийн тээврийн үйлчилгээний соёл ба хөгжлийн бэрхшээлтэй иргэд” сэдэвт сургалт хэлэлцүүлгийг зохион байгууллаа. Уг хэлэлцүүлэгт нийтийн тээврийн үйлчилгээ эрхлэгчид болон төр захиргааны байгууллагын төлөөлөл оролцсон байна. Энэ үеэр “Олон улсын хөгжлийн бэрхшээлтэй иргэдийн өдөр”-ийг угтаж нийтийн тээврийн үйлчилгээ эрхлэгч компаниудын үйлчилгээний ажилтнуудад зориулан харилцаа, хандлагын талаар сургалт зохион байгууллаа. Жолооч, кондуктор зэрэг хүмүүст зорчигчидтой харилцах хандлагаа дээшлүүлэх, эерэг харилцаа яаж бий болгох вэ гэсэн сэдвээр ХАА-н МСҮТ-ийн захирал, харилцааны доктор Н.Алтанцоож мэдээлэл, зөвлөгөө өгсөн байна. Нийтийн тээврээр байнга явдаггүй ч хааяа үйлчлүүлсэн үедээ хүндрэлтэй байдалд ордог хөгжлийн бэрхшээлтэй иргэдтэй хэрхэн харьцах вэ гэдэг дээрх үйлчилгээний байгууллагын анхаарах асуудал байдаг. Доктор Н.Алтанцоож энэ удаагийн сургалтаар өөрөөсөө эхлэн харилцаагаа өөрчилж, бусдад хэрхэн зөв үг хэлдэг дадалд суралцах тухай сонирхолтой зөвлөгөө өгчээ. [sgmb id="1"] НҮБ-аас анх 1981 оны арванхоёрдугаар сарын 03-ны өдрийг Олон улсын хөгжлийн бэрхшээлтэй иргэдийн өдөр болгосноос хойш дэлхий даяараа энэ өдрийг тэмдэглэсээр ирсэн. Хүн амын хөгжил нийгмийн хамгааллын яаманд хөгжлийн бэрхшээлтэй иргэдийн эрх ашгийг хамгаалах хөгжлийн хэлтэс байгуулагдсан байна. Хамгийн сүүлд 2010 оны хүн амын тоогоор манай улсад нийт хүн амын 4,1 хувь буюу 108 мянга гаруй хөгжлийн бэрхшээлтэй иргэн байна. Б.Оюунзаяа