“Гендрекц”-ийн өмнөх жагсаал, цуглаан хоёр дахь өдрөө үргэлжилж байна. Эх сурвалжийн мэдээлснээр жагсагчдын тавьсан шаардлагыг “Эрдэнэ үйлдвэр” ХХК-ийн удирдлагууд биелүүлэхгүй бол жагсагчид тэмцлийн дараагийн хэлбэр болох өлсгөлөн, суулт хийх тухай яригджээ. Тус үйлдвэрт насаараа ажиллаад мэргэжлээс шалтгаалах өвчний улмаас 40 хувийн тэтгэвэрт гарсан 800 гаруй иргэн байдаг. Тэдний төлөөлөл энэ удаагийн жагсаал, цуглааныг зохион байгуулж байна. Жагсагчдын зүгээс 40 хувьд гарсан ажилтан төдийгүй өвчтэй, зовлонтой иргэдийн эрх зөрчигдөж байгаа учраас аргагүйн эрхэнд тэмцлийн хэлбэрт шилжсэн гэж тайлбарлаж байна. Жагсагчид, Нэгдүгээрт: Эмнэлэг сувилалын албаны үйл ажиллагаа доголдож байгаа. Өвчтэй, хөгшин хүмүүсээр доог тохуу хийж эм тариа амралт сувилалын мөнгө төгрөгийг хассан, тус албаны дарга ёс зүйн хувьд маш их алдаа дутагдал гаргасан. Сувилалын дарга Ж.Ганчимэгийг албан тушаалаас нь огцруулах, Хоёрдугаарт, Хамтын гэрээгээр “Эрдэнэт үйлдвэр” ХХК-иас 40 хувийн тэтгэвэрт гарсан хүмүүсээс нас барсан хүмүүсийн ар гэрт 36 сарын цалинтай тэнцэх хэмжээний нөхөн олговрыг олгох ёстой гэж заасан байдаг. Гэтэл энэ мөнгөний хэмжээг хасдаг, зарим нэг хүмүүст олгоогүй байгаа. 2013 онд 14 хүн нас барсан 2014 онд 8 хүн нас барсан бүгд шүүхийн байгуулагаар явж байгаа гэлээ. Иймд дээрх хамтын гэрээний үүргээ биелүүлэхийг шаардаж байна, Гуравдугаарт, “Эрдэнэт” үйлдвэрээс жил бүр 15-30 жил ажилласан эдгээр хүмүүсийг Итгэлт хамба, болон Хамрын хийдрүү аялал хийх зардлыг гаргадаг байсныг тодорхойгүй шалтгаанаар хассан. Уг зардлыг өгөхийг шаарджээ. Дээрх шаардлагыг “Эрдэнэт үйлдвэр” ХХК-ийн удирдлагуудад хүргүүлсэн бөгөөд тодорхой үр дүнд хүртэл тэмцэх болно хэмээн Мэргэжлээс шалтгаалах өвчнөөр 40 хувийн тэтгэвэрт гарагсадын Үйлдвэрчний эвлэлийн холбооны дарга н.Мөнхгэрэл онцолжээ. Жагсагчдын тавьж буй шаардлагын талаар “Эрдэнэт үйлдвэр” ХХК-ийн удирдлагуудын байр суурийг уншигчиддаа хүргэх гэсэн боловч “Гендрекц”-ийн хамгаалалтынхан хэвлэл, мэдээллийнхэнийг нэвтрүүлэхгүй, энэ манай дотоод асуудал гэсэн тайлбар өгч байна. Ямартай ч жагсагчдын тавьсан шаардлагыг биелүүлэхээр үйлдвэрийн удирдлагууд хуралдаж, тодорхой шийдвэр гаргахаар ажиллаж байгаа тухай мэдээлэл байна. Нөгөөтэйгүүр улс төрийн хүрээнийхэний дунд “Жагсагчид Ерөнхийлөгч Ц.Элбэгдоржийн 10 жилийн ангийн охин Ж.Ганчимэгийг суудлаас нь огцруулж арай л дийлэхгүй болов уу” гэсэн мессеж ч нисч байна.