“Зэс Эрдэнийн Хувь” ХК-ийн хувьцаа эзэмшигч таны энэ өдрийн амгаланг айлтгая. Та бид итгэл сэтгэл, хүсэл зорилго, хөрөнгө хүчээ нэгтгэн “Эрдэнэтийн-Овоо” ордын исэлдсэн хүдрийг түшиглэн Катодын зэсийн үйлдвэр байгуулахаар зорьж ажиллаж эхэлснээс хойш 7 хаврыг үджээ. Энэ 7 жилд та бид гар гараа барьж, мөр мөрөө түшилцэн чамгүй олон хүндрэл бэрхшээлүүдийг туулж, арвин их ололт амжилтанд хүрлээ. Өнөөдөр та бид КАТОДЫН ЗЭСИЙН ҮЙЛДВЭРийнхээ олон улсын стандартад нийцүүлсэн банкны техник, эдийн засгийн үндэслэлийг ХБНГУ-ын Ферростаал Группээр гүйцэтгүүлж гар дээрээ хүлээн авч байна. Орхон аймгийн Монгол Ардын Намын удирдлага, Аймгийн Засаг дарга болон түүний баг хамт олон та бидний ажил үйлсийг идэвхийлэн дэмжиж ажиллаж байна. УИХ, Засгийн газрын гишүүд болон “Эрдэнэт Үйлдвэр” ХХК-ийн удирдлагууд ч манай ажлыг бүх талаар бүрэн дэмжиж ажиллахаа илэрхийлж байна. Энэхүү хамтын ажиллагааны маань үр дүн эхнээсээ гарч олон жил гацаж байсан манай үйлдвэрийн ажлын гацааг тайлж Орхон аймгийн Засаг дарга бөгөөд Эрдэнэт хотын захирагч Дамбын Батлут үйлдвэр барих газрыг манай компанид олгохоор захирамжлан шийдвэрлэлээ. Түүнчлэн Засаг даргын өгсөн үүрэг чиглэлийн дагуу бүтээн байгуулалттай холбоотой гадна усан хангамж, цахилгаан хангамж, автозамын трассуудыг батлах зэрэг холбогдох зөвшөөрлүүдийг бидэнд олгохоор Орхон аймгийн техникийн комисс ажиллаж байна. Орхон аймгийн Засаг дарга Д.Батлут болон түүний баг хамт олон, мөн Улсын Их Хурал, Засгийн газар, Эрдэнэт Үйлдвэрийн зүгээс цаашид ч орон нутгийн мянга мянган иргэдийн бодит орлогыг нэмэгдүүлэх та бидний ажил үйлсийг дэмжиж, нягт хамтран ажиллахаа илэрхийлж байна.  “Зэс Эрдэнийн Хувь” ХК-ийн баяр наадмын үйл ажиллагаан дээр газрынхаа гэрчилгээг ёслолын байдалтай хүлээн авах манай компанийн хүсэлтийн дагуу 2017 оны 07 дугаар сарын 10-ны өдөр газрын гэрчилгээг маань гардуулан өгөхөөр боллоо. Хувьцаа эзэмшигч таныг манай компанийн баярт үйл ажиллагаанд хүрэлцэн ирэхийг урьж байна. [sgmb id="1"]