Мэргэжлийн хяналтын ерөнхий газрын байцаагчид төрийн болон хувийн хэвшлийн 47 байгууллагад хяналт шалгалт хийхээр боллоо. Ажлын хэсэг аймгийн ЗДТГ-аас шалгалтын ажлаа эхлүүлсэн байна. Үүний дараа Засаг даргын дэргэдэх агентлагууд, Эрдэнэт Булганы цахилгаан түгээх сүлжээ, Уулын баяжуулах үйлдвэрийн цехүүд, хүнсний болон ХАА-н чиглэлийн үйлдвэр эрхлэгчид, аж ахуйн нэгжүүдэд ажиллах юм. Дээрх ажлын хэсгийнхэн шалгалтаас гадна зөвлөн туслах үйлчилгээ үзүүлнэ. Улсын МХЕГ-ын дэд дарга Г.Сугарбат “ Хяналт шалгалтаар байгууллагуудын зөрчлийг илрүүлнэ. Ингэснээр эрсдлээс сэргийлэх боломжтой. Орхон аймгийн нэгдсэн шалгалтаар 35 байцаагч ажиллана” гэлээ. МХЕГ-ын ажлын хэсэг зөрчил дутагдалд хариуцлага тооцохоос илүү зөвлөн туслах сургалт, тандалт судалгаа хийнэ гэдгээ хэллээ. Ажилтан норм, стандартыг зөрчих, ажилдаа хайнга хандах, тавигдах шаардлагыг биелүүлдэггүй байдлаас алдаа гаргадаг байна. Үүнд хяналт тавихад иргэдийн оролцоог нэмэгдүүлэх хэрэгтэй. Үүнтэй холбоотой ирэх сарын 15-ныг хүртэл “Дэд бүтцийн хяналтад-Иргэн таны оролцоо” аян эхлүүлсэн гэдгийг МХЕГ-ын дэд дарга онцолж байна. “Хяналт шалгалтын хуваарь гарсан. Эхний ээлжинд төр захиргааны байгууллага Иргэдийн төлөөлөгчдийн шийдвэрийг ханган ажиллаж байгаа эсэх, хууль тогтоомжийн хэрэгжилтийг шалгана. Тухайлбал хүнсний чиглэлийн үйлдвэр аж ахуйн нэгжүүдээр ажиллана.Сургуулийн “Үдийн цай” хөтөлбөрийн хэрэгжилтэд хяналт тавьж байна” гэж Орхон аймгийн МХГ-ын дарга Б. Жигдэнгомбо ярилаа. Суралцагчдын дунд хоолны хордлого авах тохиолдол гарсан. Энэ нь хэрэглэгчийн боловсрол дутмаг байгаатай холбоотой. Иймд МХЕГ, Боловсролын яамтай хамтран хүнсний аюулгүй байдлыг хангах тухай ойлголтыг сургалтын агуулгад оруулахаар ажиллаж байгаа аж. МХЕГ-ийн хяналт шалгалт дууссаны дараа тавдугаар сарны 3-наас эхлэн Эрсдлийн удирдлагын баг ажиллах юм. Энэ үеэр хэрэглэгчдэд зориулсан нээлттэй хаалганы өдөрлөг зохион байгуулна. М.Ариунчимэг [sgmb id="1"]