Монгол улсын Ерөнхийлөгчийн сонгуулийн сурталчилгаа хоёр сарын дараа эхэлнэ. Зургаадугаар сарын 26-ны даваа гарагт болох Ерөнхийлөгчийн сонгуульд эрх баригч МАН-ын хувьд сонгогчдынхоо өмнө “бооцоогоо” тавьлаа. Тэдний хувьд айсуй Ерөнхийлөгчийн сонгуульд тавих бооцоо нь “Эрдэнэт үйлдвэрийг 100 хувь төрийн өмчид авсан үйл хэрэг”. Үүнийгээ ч хийлээ. Төрийн өмчийн бодлого, зохицуулалтын газраас УИХ, Засгийн газрын гаргасан тогтоол, шийдвэрийн дагуу “Эрдэнэт үйлдвэр” ХХК-ийн Оросын талын 49 хувийг худалдан авсан “Монголын зэс” корпорацийн хувьцааг хураан авч 100 хувь төрийн мэдэлд шилжүүлж, үйлдвэрийн Төлөөлөн удирдах зөвлөлийн гишүүдийг шинээр томилсон. “Монголын зэс” корпорацийн ТУЗ дахь төлөөлөл болох Да.Ганболд, О.Орхон, Д.Мөнхбаатар нарыг чөлөөлж тэдний оронд Уул уурхай, хүнд үйлдвэрийн яамны Бодлого хэрэгжилтийн газрын дарга Д.Даваадорж, Төрийн өмчийн бодлого, зохицуулалтын газрын дэд дарга А.Дагвадорж, Эрчим хүчний яамны Төрийн нарийн бичгийн дарга Н.Мэндсайхан нарыг томилсон. Шинэчлэн байгуулагдсан ТУЗ анхныхаа хуралдааныг Эрдэнэт хотод хийж, үйлдвэрийн Ерөнхий захиралтай гэрээ байгуулах, үйлдвэрийн бүтцийг тодорхойлох, үйлдвэрийн ТУЗ-ийн бүтцийг тодотгох зэрэг эхний ажлуудаа хийсэн. Ингээд 40 шахам жилийн түүхтэй “Эрдэнэт үйлдвэр” ХХК-ийн өмч, хөрөнгө алтан унжлагат гал тахиа жилийн хаврын дунд сарын билэгт сайн өдөр Монголын төрд эргэн ирлээ. Энэхүү эргэн ирэлтийг эрх баригчид буюу МАН-ынхан ирэх сонгуулийн сурталчилгааны бооцоо болгон сонгогчдын өмнө тавьж байна. МАН-аас Ерөнхийлөгчид нэр дэвших хамгийн өндөр магадлалтай хүн нь УИХ-ын дарга, МАН-ын дарга М.Энхболд. Дараа нь УИХ-ын дэд дарга Ц.Нямдорж нарын нэр цуварна. Хэнбугай ч нэр дэвшлээ гэсэн тэдний “бооцоо” бол өнөөдөртөө Эрдэнэт үйлдвэр гэдгийг хүн бүхэн хүлээн зөвшөөрөх байх. /Өөр шинэ нөхцөл үүсэхгүй л бол/ Засаг төрийн төвшиндөө хариуцлагын тогтолцоо үгүй болчихсон, эдийн засаг нь Сэхээн амьдруулах тасагт муужраад уначихсан, нэг үгээр хэлбэл, “Дампуурал” зарлахын даваан дээр байсан улс орны хувь заяаг гартаа авсан МАН-ынханд Эрдэнэт үйлдвэрийг 100 хувь төрийн мэдэлд авах нь “Аминаас чухал үйлс” байсан. Өнөөдрийг хүртэлх хугацаанд “Эрдэнэт үйлдвэр”-ийн хувьд Ерөнхий захирлыг удирдлагын багтай нь хамт улсын Ерөнхийлөгч томилдог. Улаанбаатараас баахан чемодантай нөхдүүд ирж дарга болдог, “Бүрэн эрхт онцгой комисс” нэрийн дор мөнгө хүүлдэг улс төр бизнесийн бүлэглэлийн гарт атгуулсан тийм л баяжуулах үйлдвэр болоод байсан. Тэгвэл өнөөдөр Монголын төр, засаг “Эзэн нь юмаа мэдэж эрэг нь усаа хашдаг”-ийн зарчмаар Эрдэнэт үйлдвэрийг 100 хувь төрийн мэдэлд авлаа. Ерөнхийлөгчийн сонгуулийн үеэрх МАН-ын сонгуулийн сурталчилгааны сценари нэг иймэрхүү л явах болов уу, тэр дундаа Орхон аймагт. Гэхдээ хариу цохилт тун хатуухан, халуухан ирэх байх. “Хувийн хэвшлийг дээрэмдлээ, Хувийн өмчид халдлаа”. “Монголын төр Олон улсын Арбитрын шүүхэд дуудагдлаа” гэхийн араас “АН ирэх сонгуульд Н.Энхбаярыг нэр дэвшүүлж байна” гэх мэдээлэл цуварч эхэлбэл МАН ард түмний өмнө тавьсан бооцоогоо авах уу, алдах уу. Сонгууль болтол зай ч байна, лай ч байна. АН-ынхан дтооод сонгуулиар босгосон хэдэн халтар төгрөгөн дээрээ дажин хийгээд дуусахгүй бол шүү дээ. Эрх биш 90 гаруй жилийн түүхтэй Ардын намд давхар мэх гэж байлгүй яахав, дан ганц бооцоогоор хол явахгүй гэдгээ мэднэ, тэд. [sgmb id="1"]