Орон нутгийн эрх барих дээд байгууллага болох аймгийн ИТХ-аас энэ оны сар бүрийг нэрэмжит ажлын аян болгон өрнүүлж эхлүүлээд байгаа. Энэ ажлын үр дүн ч тодорхой хэмжээгээр гарч иргэд талархалтай хүлээн авч байгаа. Мөн үйлчилгээний байгууллагуудын хувьд ч сарын аянд идэвхтэй оролцож байгааг зохион байгуулагчдын зүгээс талархаж байлаа. Хоёрдугаар сарын аяны ажлыг Ц.Баяржаргал даргатай аймгийн ИТХ-ын хурлын Эрх зүй, Нутгийн удирдлага, Нийгмийн хөгжлийн хорооноос зохион явуулах юм байна. Хорооны зүгээс хоёрдугаар сарын нэрэмжит аяныг “Төрөлх Орхон аймаг, түүх соёл, уламжлал бидний бахархал” сэдвийн дор явуулах ажлынхаа төлөвлөгөөг тэргүүлэгчдээр батлуулахаар оруулж ирсэн юм. Хорооноос аяны хүрээнд аймгийн Үйлдвэрчний холбооны хороодын дунд эссе бичлэгийн уралдаан зарлах, сурагчдын дунд тойрон аялал зохиох гэх мэт явцуу хүрээний, хөрөнгө мөнгө үрэх ажлын санал оруулж ирсэн байна хэмээн Хурлын дарга П.Пүрэвлхагва шүүмжилж байлаа. Түүний саналыг ч тэргүүлэгчид дэмжиж иргэдэд хүртээмжтэй, хүүхэд багачуудын мэдлэг, хүмүүжилд нөлөө үзүүлэх ажил хийх хэрэгтэй гэж зөвлөв. Аяныг зохион байгуулахад аймгийн Боловсрол, соёл, урлагийн газар, сургуулийн өмнөх байгууллага, ерөнхий боловсролын сургууль, МСҮТ-үүд, аймгийн Номын төв, Музей хамтран ажиллах гэнэ. Тэргүүлэгчид ажлын төлөвлөгөөг батлаад монгол түмний уламжлалт цагаан сарйн баяр болж байгаа зэрэг онцлогийг харгалзан хоёрдугаар сарын аяны уриалгыг  “Эх орон Эрдэнэтээс эхэлнэ” уриатай явуулах шийдвэр гаргалаа. Аяны хүрээнд сургуулийн сурагчдыг аймгийн музейг үзүүлэх, орон нутгийн төрийн захиргааны байгууллагатай танилцуулах зэрэг олон ажил багтсан төлөвлөгөөг зохион байгуулагчид төлөвлөжээ. [sgmb id="1"]