Орхон аймгийн Шүүхийн Тамгын газар улсын хэмжээнд 2016 оны ажлаараа аймгуудаас тэргүүн байранд шалгараад байна. Шүүхийн ерөнхий зөвлөлийн даргын шүүхийн тамгын газрын дарга нартай байгуулсан үр дүнгийн гэрээний биелэлт, мэргэшлийн түвшний үнэлгээгээр ийнхүү тэргүүлжээ. Шагнал гардах үеэр Орхон аймгийн Шүүхийн Тамгын газрын дарга М.Ганчулуунтай ярилцлаа.  -Ажил үйлсээрээ тэргүүн байрт шалгарсанд баяр хүргэе. Энэ оны онцлох ажлаасаа нэрлэхгүй юу? -Орхон аймгийн шүүх шүүхийн шинэтгэлийг төгөлдөржүүлэх, шинэтгэлийн арван үр дүнгийн үзүүлэлтээр нэгдүгээр байр эзэллээ. Шүүгчийн хараат бус, шүүхийн бие даасан байдал, олон нийтийн хяналт зэрэг үзүүлэлтээр бусад шүүхийн үйл ажиллагаанаас түрүүлсэн гэж үзэж байна. Шүүхийн үйлчилгээг иргэд үнэлж цэгнэдэг. Тиймээс бид шүүхээр үйлчлүүлж байгаа болон үйлчилгээ аваагүй иргэдийн санал, сэтгэгдэлд тулгуурлаж ажилласан. Өөрөөр хэлбэл, яаж түргэн шуурхай, нээлттэй ил тод үйлчлэх вэ гэдгээ иргэдээсээ асуусан.  -Иргэд шүүхээс юу хүсч байна вэ? -Иргэд шүүхээсс түргэн шуурхай, ил тод үйлчилгээг хүсдэг. Үүний дагуу үйл ажиллагаа явуулахад сэтгэл ханамжтай байгаа. Хаалттайгаас бусад бүх шүүх хуралдааныг оролцогч, сонирхогчдод нээлттэй явуулдаг. Мөн шүүгчийн гаргасан эрх зүйн баримт бичгийг мэдээллийн сайт болон shuukh.mn сайтад шуурхай байршуулдаг. Манай шүүх ачаалал ихтэй байдаг. Ялангуяа анхан шатны шүүх Улаанбаатар хотын дүүргийн шүүхүүдийн хэмжээнд ажилладаг. [sgmb id="1"]