Энэ үгийн УИХ-ын сонгуулийн 47 дугаар тойрогт нэр дэвшээд байгаа МАХН-ын О.Баасанхүү Эрдэнэтчүүдэд хандан хэллээ. Өнөөдөр тэрбээр хэвлэлийн бага хурал хийж “Миний төлөө саналаа өгсөн сонгогчиддоо баярлалаа. Өнөөдөр миний утсанд 350 гаруй дуудлага, 500 гаруй захиа ирлээ. Бүгд баяр хүргэж амжилт хүсч байна. Сонгогчдын саналыг хүндэтгэж байна. Сонгуулийн санал хураалтын өмнөхөн үйлдвэрийн 49 хувийн асуудал Монгол орон даяар шуугиан тарьлаа. МАНАН арилсан ч МАН Засгийн эрхийг авахаар боллоо. Тиймээс би ямар ч тохиолдолд үйлдвэрийн 49 хувийг хэн ч авсан бай удирдлага шинэчлэгдсэн тохиолдолд ажилчдын эрх ашгийг хамгаалах болно. Нэг ч ажилтныг орон тооны цомтголоор халуулахгүй, харин ч ажлын байрыг нэмэгдүүлэхийн төлөө та бүхэнтэй хамтран ажиллах болно” гэлээ. Энэ үеэр манай сэтгүүлч түүнээс “Нар туссан цаг” сониныг цагдаад өгч шалгуулсан асуудал юу болсон бэ. Та сонгуулийн сурталчилгааны төгсгөлийн үеэр МАН, МАХН хоёр нэгдэнэ гэдэгт итгэдэг гэж ярилцлага өгсөн. Та үүнд хариулт өгнө үү” хэмээн асуусан. Үүнд О.Баасанхүү “Нар туссан цаг сониныг би цагдаад өгөөгүй. Манай шадар туслах сонинд гарсан зүйлтэй нь холбож өгсөн. Сониныхон бүгдээрээ надтай уулзан уучлалт гуйсан. Тиймээс би штабынхандаа цагдаад хандсан асуудлаа татаж авахыг үүрэгдсэн. Хоёр намын нэгдлийн хувьд би өнөөдөр МАХН-ыг төлөөлөхгүй. Тиймээс би нэгдэх тал дээр хариулт өгөх боломжгүй” гэсэн юм.