Аймгийн ИТХ-ын тэргүүлэгчдийн хуралдаанаар Хот тохижуулах газрын ангиллыг өөрчиллөө. Өнөөдрийг хүртэл дээрх байгууллага нь Хот тохижуулах газар орон нутгийн өмчит аж ахуйн тооцоот үйлдвэрийн газар /ОНӨААТҮГ/гэсэн нэр, ангилалтай явж ирсэн. Өнгөрсөн онд өөрчлөлт орсон Татварын тухай хуулийн дагуу Хот тохижуулах газрын ангилалд өөрчлөлт хийх шаардлага гарчээ. Эднийх иргэдээс хогны мөнгөний орлого олж түүнийгээ улсын төсөвт төвлөрүүлдэг. Улмаар дээрх төсөвт төвлөрсөн хөрөнгөнөөс өөрсдөө захиран зарцуулах эрх нь хуулиар хязгаарлагдсан. Нөгөөтэйгүүр өнгөрсөн оноос Хот тохижуулах газрын санхүүлжилтийг улсын төсвөөс гаргадаг зэрэг өөрчлөлт орсон учраас эднийх НӨТ төлөгчөөр бүртгэгдэх эрх зүйн орчин үүсчээ. Хэрэв НӨТ төлөгчөөр явбал эднийх аж ахуйн статустай болох учраас аймгийн Өмчийн харилцааны газраас холбогдох хуульд заасны дагуу Хот тохижуулах газрын ангиллыг өөрчлөх саналыг Тэргүүлэгчдийн хуралдаанд оруулсан юм. Өмчийн харилцааны газраас гаргасан саналд Хот тохижуулах газар ОНӨААТҮГ гэсэн ангиллыг хасаад нэрийг нь хэвээр үлдээж, төсөвт байгууллага болгон Улсын бүртгэлд тусгуулах, тамга тэмдгийг нь өөрчлөх саналыг тавьсаны дагуу тэргүүлэгчид хэлэлцсэн юм. Ингээд оруулж ирсэн төслийн дагуу буюу Хот тохижуулах газар төсөвт байгууллага байхаар өөрчлөгдөв. Энэ үеэр тэргүүлэгч Ш.Ганбат, Д.Чулуунбат нар “Хот тохижуулах газар гэсэн нэрийг өөрчлөх хэрэгтэй. Тохижуулах гэсэн үг ардаа аж ахуйн газар гэдгийг харуулаад байгаа. Паблык сервис буюу нийтийн үйлчилгээний газар гэсэн зориулалтынх нь нэрийг өгөхгүй бол өөр агуулгатай болох гээд байна” гэсэн санал гаргасан. Тэргүүлэгч Д.Батхуяг “Өнөөдөр Хот тохижуулах газар 2.2 тэрбум төгрөгийн төсөвтэй. Түүнийгээ улсаас авдаг. Үндсэн чиг үүргийг нь өөрчлөхгүйгээр гадны орнуудын жишгийн дагуу зарим үйлчилгээг нь хувийн хэвшлийнхэнд өгөх ёстой. Төрийн зарим чиг үүргийг гэрээний дагуу хувийн хэвшлийнхнээр гүйцэтгүүлдэг журам ч бий. Ингэсэн тохиолдолд төрд ирэх ачаалал тэр хэрээр багасна. Мөн хувийн хэвшлийнхний дунд сонгон шалгаруулалт явуулж нийт төсвийн 1.5 тэрбумыг нь тэдэнд өгвөл өрсөлдөөн гарч ажил ч ахицтай болох талыг нь Өмчийн харилцааны газар, аймгийн ЗДТГ-ынхан судалж үзэх хэрэгтэй. Хэдий болтол хуучин хэвээрээ явах вэ. Гадныхан хот тохижилтоо хувийн хэвшилдээ даатгаад болж л байна” гэсэн санал, дүгнэлт хэллээ. Хот тохижуулах газрын дарга Р.Рагчаагийн хувьд ашиг сонирхлын зөрчлийн дагуу санал хураалтад оролцоогүй ч тэргүүлэгчийн хувиар саналаа илэрхийлэхдээ яваандаа тус газрыг нийслэлийн “Улаанбаатар нэгтгэл” гэдэгтэй адил “Эрдэнэт нэгтгэл” гэсэн зохион байгуулалтад оруулж болох тухай онцолсон юм.