Улс тунхагласны баярын өдөр болсон аймгийн Засаг даргын зөвлөлийн хуралдаан хэвлэлийнхэнд “хаалттай” болж өнгөрлөө. Өмнө нь “Засаг даргын зөвлөл хуралдана” хэмээх зарыг хэвлэлийнхэнд түгээдэг байсан бол энэ удаад хэвлэлийнхэнээс нууцхан, зар тараалгүй хуралдсаны шалтгаан нь тун энгийн аж. Энэ удаагийн хурлаар Аймгийн эдийн засаг, нийгмийн 2015 онд хөгжүүлэх үндсэн чиглэлийн урьдчилсан гүйцэтгэл, 2016 онд аймгийн эдийн засаг, нийгмийг хөгжүүлэх үндсэн чиглэлийг хөгжүүлэх үндсэн чиглэлийн төслийн тухай. Аймгийн 2015 оны төсвийн урьдчилсан гүйцэтгэл, 2015 оны тодотгосон төсөв, 2016 оны төсвийн төслийн тухай. Жаргалант сумын Малчин багийн зохион байгуулалтыг өөрчлөх саналын тухай. Зоорь, хүлэмжийн болон эрчимжсэн мал аж ахуй эрхлэгчдийг шалгаруулан урамшуулах тухай зэрэг асуудлыг хэлэлцсэн байна. Хоёрдугаар асуудал болох “Аймгийн 2015 оны төсвийн урьдчилсан гүйцэтгэл, 2015 оны тодотгосон төсөв, 2016 оны төсвийн төслийн тухай” яригдах болсон учраас Тамгын газрын зүгээс хэвлэлийнхэнээс зайгаа барьжээ. Сонгуулийн жилийн төсвийг аймгийн ИТХ-д оруулахын өмнө ЗДТГ-ынхан ийнхүү хэвлэлийнхэнээс нууцалж байгаад зарим нэг төсөл хөтөлбөрт тусгагдсан мөнгөний талаарх мэдээллийг нийтэд ил болгохгүйг хичээсэн бололтой.