Эрдэнэт хотод сүүлийн үед орон сууцны барилга олноор баригдаж байгаа нь сайшаалтай ч иргэд баталгаагүй барилгад захиалга өгч, эдийн засгийн хувьд хохирох явдал ихэсч байна. Энэ талаар аймгийн ЗДТГ-ын Хөрөнгө оруулалт, хөгжлийн бодлогын хэлтсийн дарга С.Даваадоржоос тодрууллаа.

-Иргэд орон сууцны барилгын компаниудад захиалга өгөхдөө хариуцлагатай хандмаар байна. Дөнгөж кундамаа цутгаж байхад иргэд мөнгөө өгөөд эхэлчихдэг. Уг нь Улсын комисс тухайн барилга дээр ажилласан уу, гарц, орц, тохижилт, хүүхдийн тоглоомын талбай нь шийдэгдсэн үү, хүн амьдарч болох нөхцөл  хангагдсан уу гэдгийг харах ёстой. Гэтэл эдгээр нөхцлүүд байхгүй барилгад захиалга өгч байна. Тэгээд дараа нь байр халаалтгүй байна гээд төрд хандаад байдаг. Энэ асуудлууд 1А, 2А хороолол дээр гарч байгаа. 1А хорооллын дэд бүтцийн ажил одоо болтол хийж дуусаагүй. Компанийг нь бид шахаад, ажлыг нь гүйцэтгүүлэх гээд ажиллаж байна. Инженерийн дэд бүтцийн ажлаа дуусаагүй байхад барилгын компаниуд иргэдээс захиалга авчихдаг. Иргэд мөнгөө өгсөн учраас байрандаа ормоор байна гээд байдаг, бусад дэд бүтцийн асуудал нь шийдвэрлээгүй байран дээр захиалгаа хийсэн учир хүндрэл үүсээд байна. Төр иргэн хүнийг энэ байранд захиалга өг гэж хэлээгүй.

-Дэд бүтцийн асуудал нь шийдэгдсэн барилга дээр захиалга өгөх нь аюулгүй. Ашиглалтад ороод дотор нь хүн амьдраад байдаг, гэтэл мэргэжлийн шаардлага хангаагүй, улсын комисс хүлээж аваагүй барилга баригдаж байна. Тиймээс ч 2А хорооллын барилга дээр өнгөрсөн жил гал гарсан. Ер нь бол барилгын компанийн ажил дээр тухайн барилгын ажлын ерөнхий төлөвлөгөө зурагтай байж ажил нь эхэлнэ. Өнөөдрийн байдлаар манай аймагт 26 иргэн барилга барьж байна, эдгээрээс 13 нь зөвшөөрөлтэй ажиллаж байна. Үлдсэн 13 нь ажил явуулах зөвшөөрөл аваагүй. Эхнээсээ зөвшөөрөлгүй эхэлсэн барилга дээр улсын комисс ажиллахад хүндрэлтэй. Эндээс ямар асуудал үүсч байна вэ гэхээр, улсын комиссыг буруутгах, төрийг буруутгах байдал гардаг. Барилгын гүйцэтгэгч компаниуд эсвэл иргэн санхүүжилтээ босгохын тулд иргэдээс мөнгө авч ажлаа эхлүүлдэг. Иймд иргэд орон сууц захиалахдаа мэргэжлийн талаас нь харж, судалгаа хийж байж мөнгө төгрөгөө өгөөрэй гэж хэлье.