“Эрдэнэт үйлдвэр” ТӨҮГ-ын Тамгын газрын дарга, бизнесийн удирдлагын доктор Доржсүрэнгийн Үүрийнтуяагийн “Уул уурхайн үйлдвэрлэлийн бүтээмж-үр ашиг” номын нээлт өнөөдөр боллоо. Номын нээлтийн ёслолд түүний аав, ээж, гэр бүл, найз нөхөд, Эрдэнэт үйлдвэрийн бүтцийн нэгжийн удирдлагууд, хамтран зүтгэгчид, уурхайчдын төлөөлөл хүрэлцэн ирж хүндэтгэл үзүүлэв. Зохиогч номынхоо эхэнд “Газрын хэвлийн баялаг бол бидний ирээдүйгээсээ зээлж буй өр юм. Харин бид нөөц баялгаа бүтээмж өндөртэй, үр ашигтай ашиглах нь үр хойчдоо үлдээж буй өв юм” хэмээн онцолжээ.

Доктор Д.Үүрийнтуяа уул уурхайн үйлдвэрлэлд газрын хэвлийн баялгийг хаягдал багатай бүрэн ашиглаж, нэмүү өртөг шингэсэн эцсийн бүтээгдэхүүн үйлдвэрлэх, экспортын орлогыг нэмэгдүүлэх, эдийн засгийг төрөлжүүлэх, баялгийн санг бүрдүүлэн улс орны эдийн засгийн чадавхийг бэхжүүлэхэд уул уурхайн үйлдвэрлэлийн бүтээмж, үр ашгийг судалж дээшлүүлэх асуудал чухал ач холбогдолтойг номынхоо “дээж үг”-нд цохон тэмдэглэсэн. Иймээс бүтээмж, үр ашгийн онол арга зүйд тулгуурлан өөрийн ажиллаж буй Эрдэнэт үйлдвэртээ түшиглэн уул уурхайн үйлдвэрлэлийн бүтээмж, үр ашгийн харилцан хамаарал, уялдааг судалж, тэдгээрийг дээшлүүлэх арга замыг тодорхойлох судалгаа хийсэн байна.

Түүний судалгааны ажил нь Эрдэнэт үйлдвэрийн ерөнхий, хэсэгчилсэн бүтээмжийн үзүүлэлтүүд болон бүтээмж, үр ашгийн хам шинжийг илэрхийлэх Малмквист, Торнквист индексүүдээр хэмжиж, шинжилсэн анхны судалгаа төдийгүй Эрдэнэт үйлдвэрийн технологийн, эдийн засгийн, хуваарилалтын үр ашгийг Малмквист индексийн үр дүнг ашиглан тооцсон анхны бүтээл болсноороо онцлог юм. Түүнээс гадна “Эрдэнэт үйлдвэр” ТӨҮГ-ын бүтээмж, үр ашгийг сайжруулах арга замыг тусгаж өгснөөрөө практик ач холбогдолтой хэмээн мэргэжилтнүүд үзэж байна.