XVII жарны "Үзэсгэлэн болгогч" хэмээх харагчин туулай жилийн сар шинийн баярын босгон дээр “Эрдэнэт үйлдвэр” ТӨҮГ-ын Хэвлэл мэдээлэл, олон нийттэй харилцах албанаас эрхлэн гаргадаг “Өнөөгийн Эрдэнэт” сонины сэтгүүлч Түмэндэмбэрэлийн Батчулуун, Ямпилын Энхтуяа нар төрийн дээд шагнал Алтангадас одон хүртлээ. Сониноор овоглосон сэтгүүлчид маань сэтгүүл зүйн салбарт олон жил “дөрөө харшуулан” хамт ажиллахдаа Эрдэнэт үйлдвэрийн өрнүүн амьдрал, ажил үйлс, мянга мянган уурхайчдынхаа хөдөлмөр зүтгэл, шинэ санаа, хосгүй авьяас чадварыг уудлан нээж, тэдэнд урам зориг, урагшлах амьдралын дардан зам татсан. Түүгээр зогсохгүй дэлхийд данстай “Эрдэнэт” хэмээх их үйлдвэрийн түүхийг 20 гаруй жил бичиж “баринтагласан” нь үнэ цэнтэй юм.  

Сэтгүүлч Т.Батчулуун “Амь сэтгэл”, ”Он цагийн урсгал”, ”Эрдэнэт хүмүүн толь”, ”14 Далай ламын намтар цадиг болоод мэргэдийн цомог оршвой” зэрэг яруу найраг, сэтгүүл зүйн ном бичсэн. Хэвлэл мэдээллийн салбарт 23 жил ажиллах хугацаандаа 1000 гаруй хүний хөрөг нийтлэл, ярилцлага бичсэний зэрэгцээ “Баян-Өндөр хайрхан”, “Эхийн сэтгэл”, “Далд анир”,”Чамайг бодох сайхан” зэрэг 30 гаруй нийтийн дуу, “Онон-Балж домог түүхийн өлгий”, ”Хүнээ хөгжүүлсэн он жилүүд” зэрэг баримтат кино, “Уран бүтээлчийн цаг” 40 гаруй цуврал нэвтрүүлгийг үзэгчдийн хүртээл болгосон юм.  

Нэгэн цагт Хэвлэл мэдээлэл, олон нийттэй харилцах албаны чадварлаг, оюунлаг сэтгүүлчээр тодорч байсан Я.Энхтуяа нь сэтгүүл зүйн зөвхөн нэг төрлөөр дагнан бичдэг бус мэдээ, сурвалжилга, ярилцлага, хөрөг, нийтлэл, тэмдэглэл гээд бүхий л төрлөөр мэргэжлийн мэдрэмжтэй, ур чадвартай бичдэг сэтгүүлч юм. Түүний бичсэн нийтлэл, сурвалжилга, бүтээсэн хөрөг найруулал, ном товхимол бүхэн цаг хугацааны илэрхийлэл, давтагдашгүй нандин түүхийг өгүүлж байдаг онцлогтой. 
Уул уурхайгаар мэргэшсэн сэтгүүлчдийн тэргүүн эгнээнд ганзага нийлэн амжилттай яваа сэтгүүлч нартаа баяр хүргэж, ажлын өндөр амжилт, амьдралын сайн сайхан бүхнийг хүсэн ерөөе!