Газрын харилцаа, хот байгуулалтын газрын ахлах мэргэжилтэн Г.Болдбаатартай тус байгууллагаас  “Соёлыг түгээе” аяны хүрээнд хийж, хэрэгжүүлж буй ажлынх нь талаар ярилцлаа.

 -Аймгийн удирдлагаас орон нутгийн хэмжээнд “Соёлыг түгээе” аяныг нэг сарын хугацаатай зарлаад багагүй хугацаа өнгөрлөө. Газрын харилцаа, барилга хот байгуулалтын газар бол өөрийн гэсэн өвөрмөц онцлогтой байгууллага. Иргэдэд газартай холбоотой үйлчилгээг хүргэдэг. Энэ талаасаа иргэдийн хөлд хамгийн их даруулдаг л даа?

-Аймгийн Засаг даргаас санаачилсан “Соёлыг түгээе” аяныг манай байгууллагынхан талархан дэмжиж, идэвхтэй оролцож байна. Энэхүү аяны хүрээнд манай байгууллага нэг сарын хугацаанд 9 чиглэлээр ажиллахаар ажлаа төлөвлөж, зохион байгуулаад эхэлсэн. Тухайлбал, газрын нэгдмэл сангийн харилцаа цахимд шилжсэнтэй холбогдуулж төр, хувийн хэвшлийн байгууллага, хэсгийн ахлагч нарт зориулсан сургалтууд хийж байна.

- “Соёлыг түгээе” аянтай бараг зэрэгцээд  шахуу газартай холбоотой зарим үйлчилгээ цахимжиж байгаа талаарх мэдээлэл гарч эхэлсэн. Иргэд заавал газрын албанд өөрийн биеэр очилгүй зарим нэр төрлийн үйлчилгээг цахимаар авах боломжтой болсон. Нөгөө талдаа иргэд цахимаар төвөг чирэгдэл багатайгаар газрын үйлчилгээг авч байна гэдэг чинь соёлын нэг дэвшил л дээ?

-Тэгэлгүй яахав. Газартай холбоотой зарим үйлчилгээ цахимжиж байна гэдэг бол яах аргагүй соёлын ахиц дэвшлийн нэг хэлбэр мөн. Өнөөдрийн байдлаар  газартай холбоотой үйлчилгээ цахимд шилжсэнээр газрын харилцааны чиглэлийн 17 үйлчилгээг иргэн, аж ахуйн нэгж, байгууллага өөрийн цахим системд хаана байрлаж байгаагаас хамаарахгүй шууд авах боломжтой болсон. Энэ бол иргэдийн хувьд үнэхээр дэвшилтэт алхам. Бид газартай холбоотой зарим мэдээлэл цахимжсантай холбоотой мэдээллийг иргэдэд хүргэх ажлыг  “Соёлыг түгээе” аяны ажлын төлөвлөгөөнд ч оруулаад ажиллаж байна. Egazar.gov.mn цахим хуудсыг ашиглан иргэн, аж ахуйн нэгж, байгууллага нь газартай холбоотой 12 төрлийн лавлагаа, 17 төрлийн үйлчилгээг авах, төрийн үйлчилгээг ил тод, түргэн шуурхай авах боломжтой болсон. Газрын нэгдмэл сан цахим болж байгаа хэдий ч дээрх цахим систем  100 хувь  нэвтэртэл заалаар үйлчлүүлж байгаа иргэдийг соёлтой боловсон үйлчлүүлэх ажлын хүрээнд egazar.gov.mn сайт, болон  ашиглаж мэдэхгүй байгаа иргэнд зааж өгөх, танилцуулах зорилгоор e-mongolia төрийн үйлчилгээний нэгдсэн төв дээр 2 эрх зүйн хөтчийг ажиллуулж байна. Мөн Газрын харилцаа, барилга, хот байгуулалтын газар дээр угтах үйлчилгээ нэвтрүүлэн суурин компьютер байршуулж, иргэнд хэрэгтэй бичгийн цаас, бал гэх мэт албан шаардлагатай зүйлсийг тавьсан байна.

- Байгууллагын хувьд угтах үйлчилгээ маш чухал. Иргэн хүн би эндээс төрийн үйлчилгээг авна гээд очдог. Тэр хүнийг угтаж авах тал дээр танайх өөр болсон харагдана. Ухаалаг утасгүй хүн тэр бүр байхгүй гэдэг ч заавал танайд биеэрээ очиж үйлчилгээ авдаг хүмүүс ирсэн л байна?

-Газрын нэгдмэл сангийн мэдээлэлтэй холбогдуулж иргэд цахимд шилжихэд одоохондоо 100 хувь бэлэн биш байгаа. Иймээс байгууллагын хэмжээнд иргэн, хуулийн этгээдэд зөвлөгөө, өгөх угтах үйлчилгээндээ анхаарч ажиллаж байна. Зориод ирсэн иргэнд  “Цахим дээр байгаа, гар утсаараа ороод үз” гэж хэлэх эрх байхгүй. Үйлчилгээ авахаар ирсэн иргэнд мэндийг нь мэдээд, ямар үйлчилгээ авахаар ирсэн талаар нь асууж лавлаад холбогдох мэргэжилтэнд нь танилцуулах гээд угтах үйлчилгээний талаар анхаарч ажиллаж байгаа. Зарим аж ахуй нэгж цахимд  өөрсдийн бүртгэлээр яаж нэвтрэх вэ гээд асууж ирэх, гар утсан дээрээ апп-ыг суулгахаа мэдэхгүй иргэн ч ханддаг. Иймээс угтах үйлчилгээ бол маш чухал. Ер нь угтах үйлчилгээнээс байгууллагын соёл харагдана л даа.  Манай байгууллага угтах үйлчилгээн дээрээ анхаарч, иргэд ямар үйлчилгээ авах гэж байгаагаас хамаараад тухайн үйлчилгээтэй холбоотой мэргэжилтнүүд заавар зөвөлгөө өгч, цахим хэлбэрт шилжүүлэх үйлчилгээг үзүүлж байна. Ингэснээр иргэн, аж ахуйн нэгжүүд хялбар аргаар газрын харилцаатай холбоотой бүх мэдээллийг авах боломжийг бүрдүүлж байна.

-Урт цагааны гудамжины дунд хэсэгт зураг зурж байхтай таарсан. Зургийн дээд талд ч билүү танай байгууллагын таних тэмдэг, лого харагдсан. Танайхаас хийж байгаа ажил гэж ойлгосон. Домогт “Битлз” хамтлагийн хөшөөг зурган хэлбэрээр зурах санаа хаанаас гарсан бэ. Эрдэнэтийн иргэдийн хувьд үнэхээр сайхан ажил болох гээд байна?

- “Соёлыг түгээе” аян аймгийн хэмжээнд зарлагдсаны дараахан манай байгууллагын дотоод хурал дээр ямар ажил хийж болох тухай ажилчдаасаа санал авсан. Олон ч санал, санаа манайхнаас гарсан. Түүний нэг нь “Битлз” хамтлагийн зургийг Урт цагааны гудамжинд зурж хийх санаа байсан. Ингээд л манайхан хамт олноороо ярилцаад энэ ажлыг хийхээр болсон. Эрдэнэтийн олон мянган залуус “Битлз“ хамтлагийн дууг сонсох дуртай. Улаанбаатар орохоороо Их дэлгүүрийн өмнө байдаг хөшөөнд нь ч заавал очдог залуус ч бий. “Битлз” хамтлаг тухайн үедээ дуу хөгжмөөр дамжуулж дэлхийн олон зуун сая залууст соёлыг түгээсэн. Эрдэнэтийн төв гудамж болох Урт цагаанд “Битлз”-ийн зураг байх нь үнэхээр гоё шүү дээ.