Аймгийн Засаг даргын Зөвлөлийн хурал саяхан болж ЗДТГ-ын Нийгмийн бодлогын хэлтэс, аймгийн Биеийн тамир, спортын газартай хамтран гаргасан “Өвлийн спортыг хөгжүүлэх дэд хөтөлбөр”-ийн боловсруулалтын үйл явцтай танилцлаа.

Хөтөлбөр боловсруулах ажлыг хариуцсан Нийгмийн бодлогын хэлтсийн Ахмад настан, биеийн тамир, спортын асуудал хариуцсан ажилтан Д.Амарзаяа болон аймгийн БТСГ-аас 50 гаруй хүнийг хамруулсан хэлэлцүүлэг зохион байгуулж санал авсан зэргээр хийж хэрэгжүүлсэн ажлаа танилцуулсан.

Хөтөлбөрийг хэрэгжүүлэхийн тулд 4 зорилт дэвшүүлж, 2 чиглэлээр, 2020 оныг дуустал ажиллахаар төлөвлөсөн зэрэг нь аймгийн Засаг даргын Зөвлөлийн гишүүдэд таалагдсангүй. Бүр тодруулбал, “аймгийн ЕБС-иудад өвлийн спортын мэргэжлийн багштай болно, хоккейн талбай 3-ыг байгуулна, тэшүүр, шорт-трейкийн спортыг хөгжүүлнэ. Өвлийн спортын багш нарт цагийн 5000 төгрөгийн урамшуулал олгоно” гэх зэрэг олон заалт Зөвлөлийн гишүүдийн санаанд хүрсэнгүй.

Аливаа хөтөлбөрийг боловсруулахдаа үндэслэл судалгааг нь нарийн тооцсоны үндсэн дээр зорилго, зорилтоо дэвшүүлнэ. Хийх ажлаа төлөвлөнө, хөрөнгө мөнгөний асуудлынхаа гаргалгааг нь гаргана, хүрэх үр дүнгээ тооцно, хэрэгжүүлэх урт, богино хугацааны төлөвлөлтөө нарийн гаргах зэрэг чимхлүүр ажил ихтэй. Энэ удаагийн Ажлын хэсгийн боловсруулсан хөтөлбөрт энэ бүхэн дутуу байлаа. Ямар сайндаа Засаг даргын Зөвлөлийн гишүүд болон Хэвлэл мэдээллийнхнээс ичихдээ  ЗДТГ-ын дарга Д.Соёлчхүү нүүрээ дарж “Арай ч дээ ийм юм хийх гэж. Ичиж байна. Хоёр санал байна. Нэгд, боловсруулсан дэд хөтөлбөрийг буцаая. Дахиж хийлгэе. Ийм юм оруулж ирэх гэж. Дээр нь Амарзаяад сахилганы арга хэмжээ авъя. Өөр арга алга. Засаг дарга аа” хэмээх санал гаргаж байхав.

Аймгийн Засаг дарга ч “Энэ удаагийн оруулж ирсэн хөтөлбөр үнэндээ түүхий байна. Ирэх оны нэгдүгээр сард багтааж Зөвлөлийн хурлаар оруулж ир. Дахин ийм юм оруулж ирвэл  Соёлчхүү дарга аа хариуцсан бүх албан тушаалтнуудад арга хэмжээ ав. Арай ч дээ” хэмээснээр хөтөлбөрийг дахин боловсруулахаар буцаав.