Аймгийн ИТХ-ын 2016 оны зургаадугаар сарын 10-ны өдрийн 63 дугаар тогтоолоор жил бүрийн наймдугаар сарын 12-ныг “Анхдагч, илгээлтийн эздийн өдөр” болгон орон нутгийн хэмжээнд тэмдэглэн өнгөрүүлэхээр тогтсон. Энэ жилийн хувьд  наймдугаар сарын 12-нд Жаргалант суманд энэ баярыг тэмдэглэхээр болжээ. Аливаа нэг баяр, наадам гэхлээр л бөх барилдаж, морь уралддаг бол энэ удаад аймгийн ЗДТГ-аас “Анхдагч, илгээлтийн эздийг өдөр”-ийг аймгийн Засаг даргын мөрийн хөтөлбөрт багтсан “Анхдагч” дэд хөтөлбөрийн дагуу урлаг, спортын арга хэмжээний хүрээнд тэмдэглэн өнгөрүүлэхээр болжээ. Түүхэн өдрийг тэмдэглэн өнгөрүүлэх А.Түвшинжаргал даргатай комиссоос аймгийн хэмжээнд үйл ажиллагаа явуулдаг анхдагч, илгээлтийн эздийн дөрвөн холбоотой хамтран анхдагчдаа алдаршуулах, өндөр настай зарим нэг хүнд тусгайлан хүндэтгэл үзүүлэхээр болжээ. Нийтдээ аймаг, орон нутгийн зүгээс 10 гаруй сая төгрөг зарцуулан зохион байгуулж буй “Анхдагч, илгээлтийн эздийн өдөр”-т оролцохоор Жаргалант сумыг зорих ахмадууддаа очих, ирэхэд нь нийтийн тээврээр үнэгүй үйлчлэх гэнэ. Нийтийн тээвэр Амарын талбайгаас 12-ны өглөө 10.00 цагт хөдлөх юм байна. [sgmb id="1"]