Орхон аймаг  2016 оны арванхоёрдугаар сард БНХАУ-ын ӨМӨЗО-ны Манжуур хоттой хамтын ажиллагааны гэрээ байгуулж улмаар  тус хоттой эдийн засаг, соёл урлаг, аж үйлдвэр, нийгмийн бүхий л салбарт хамтран ажиллах боломж бүрдсэн юм. Үүний хүрээнд энэ сарын 8-10-ны хооронд БНХАУ-ын ӨМӨЗО-ны Манжуур хотод анх удаа “Эрдэнэт хотын эдийн засаг, соёлын өдрүүд” –ийг зохион байгууллаа.           Уг арга хэмжээнд аймгийн Засаг дарга Д.Батлут, аймгийн ИТХ-ын нарийн бичгийн дарга Д.Эрдэнэцэцэг, Засаг даргын орлогч А.Түвшинжаргал, ХОХБТХ-ийн дарга Ц.Баяржаргал, Баян-Өндөр сумын Засаг дарга С.Ганцогт болон бусад албаны хүмүүс оролцсон юм. Манжуур хотын Гадаад харилцааны удирдлагын ордонд аймгийн Засаг дарга Д.Батлут, Манжуур хотын Намын хорооны дарга Чэнь Ли Шинь нар хамтран ажиллах төлөвлөгөөнд гарын үсэг зурж, хоёр хот аялал жуулчлалын сүлжээ байгуулах, цэцэрлэгжүүлэлт, ногоон байгууламжийг нэмэгдүүлэхэд хамтрах, Орхон аймагт баригдах “Хүүхэд, залуучуудын соёл, амралтын хүрээлэн” байгуулахад  дэмжин ажиллах чиглэлээр санал солилцлоо. Манжуур хотын Намын хорооны дарга Чэнь Ли Шинь,  Манжуур хотод жил бүрийн долоодугаар сард болдог “Олон Улсын шинжлэх ухаан, технологийн экспо”-д оролцохыг урихын сацуу соёл, урлаг, боловсрол, спортын салбарын хамтын ажиллагааг өргөжүүлэх, хөрөнгө оруулалт, төсөл хөтөлбөр хэрэгжүүлэхэд энэ удаагийн уулзалтын зорилго оршиж байна гэсэн юм. Уулзалтын төгсгөлд аймгийн Засаг дарга Д.Батлут 20 дугаар сургуулийн сурагчдын бүтээлийн дээжээс Манжуур хотын удирдлагуудад бэлэглэж, “Бид хүүхдүүдийн бүтээлийг орон нутгийн бэлгийн багцдаа худалдан авч, хүүхэд тус бүрт хадгаламжийн данс нээн, ирээдүйн баялаг бүтээгчдийг урамшуулж байгаа” гэсэн юм.  Үүнийг зөв санаачилга,  зөв уриалга байна хэмээн Манжуур хотын удирдлагууд олзуурхаж байсныг тэмдэглэе. Б.Ханд[sgmb id="1"]