Аймгийн ИТХ-аас сонгогдсон төлөөлөгч, сонгогч хоёрын уялдаа холбоог сайжруулах зорилгоор энэ жил “Төлөөлөгчийн нэг өдөр” арга хэмжээг Баян-Өндөр сумын багууд дээр зохион байгуулж эхэлсэн. Даваа гарагт  Яргуйт багт “Төлөөлөгчийн нэг өдөр” өдөрлөгийг явууллаа. Тус багаас аймгийн ИТХ-д сонгогдсон төлөөлөгч Ц.Ойдов, Баян-Өндөр сумын ИТХ-ын төлөөлөгч П.Ганзориг нар Яргуйт багийн сонгогчидтой уулзаж тэдний санал, хүсэлтийг сонсохын зэрэгцээ аймгийн ИТХ-аас авч хэрэгжүүлж байгаа арга хэмжээний талаар мэдээлэл хийсэн юм. Яргуйт багийн иргэд ч төлөөллөө хүрэлцэн ирсэнд талархаж өөрсдийн өмнө тулгамдаж буй асуудлаа танилцуулахын зэрэгцээ багийнхаа хөгжлийн талаар ч саналаа гаргаж байв.  Иргэдийн хувьд “Эцгээ санасан хүүхэд” шиг л аймгийн ИТХ-ын төлөөлөгч Ц.Ойдовт хандан “Хөгжлийн бэрхшээлтэй хүүхдээ нийгэмшүүлэхэд хаана хандах вэ, хашааныхаа газрыг өмчилж авмаар байна, шар усны үерээр хэцүүдсэн. Одоо суваг шуудуу татуулмаар байна” гэх зэргээр олон асуудлаар хандаж байв. Ц.Ойдовын хувьд зарим нэгний асуудлыг шийдэхийн тулд Эрүүл мэнд, нийгмийн даатгалынханд, Онцгой байдлынханд хандаж иргэдийнхээ эрх ашгийн талаар дуулгаж байв. “Төлөөлөгчийн нэг өдөр” өдөрлөгийн үеэр аймгийн хэмжээнд ажилладаг төрийн байгууллагууд иргэдэд мэдээлэл, сурталчилгаа хийж гарын авлага, тарааж өгөх материалаар гэр хорооллынхныг хангасан юм. Мөн багийн Иргэдийн нийтийн хурал, Засаг даргын зүгээс аж ахуй эрхлэгч иргэдийнхээ бүтээгдэхүүнээр үзэсгэлэн худалдаа зохион байгуулав. Аймгийн ИТХ-аас энэ оны нэгдүгээр улирлыг “Үндэсний бахархал нутгийн хөгжил”, хоёрдугаар улирлыг “Эх дэлхий байгаль орчин-Эко Эрдэнэт”, гуравдугаар улирлыг “Өвөлжилтийн бэлтгэл”, дөрөвдүгээр улирлыг “Төрийн үйлчилгээний соёл” сэдвийн дор нэрэмжит аян зохион байгуулахаар төлөвлөжээ. [sgmb id="1"]