Улсын Онцгой комиссынхон өнгөрсөн долоо хоногт манай аймагт ажилласан. Энэ үеэр комиссын бүрэлдэхүүнд ажилласан Хүнс, хөдөө ахуйн дэд сайд Ж.Сауле өвөлжилт хүндэрч зуд болсон энэ үед яамнаас авч байгаа арга хэмжээний талаар мэдээлэл хйисэн. Мөн тэрбээр манай аймагт дутагдалтай байгаа шүлхийн вакцины асуудлыг анхааралдаа авч буйгаа илэрхийлсэн. Тэрбээр “Танай аймгийн Хүнс, хөдөө аж ахуйн газар шижигнэсэн, залуухан даргатай. Та бүхэн сайн ажиллаж байна. Малчдынхаа талаарх мэдээллийг маш сайн боловсруулжээ. Орхон аймгийн Хүнс, хөдөө аж ахуйн газрын хувьд хүндрэлтэй асуудал байгаа. Шадар сайд аа, энэ аймгийн Хүнс, хөдөө аж ахуйн газар өөрийн гэсэн байр байхгүй. Одоогийн байгаа байр нь орон сууцны нэг давхарт байдаг. Улсын хэмжээнд Баян-Өлгий, Ховд аймгийн Хүнс, хөдөө аж ахуйн газрын байр маш хүнд байгаа. Тэдний дараа Орхон аймгийн Хүнс, хөдөө аж ахуйн газар орно. Хүнс, хөдөө аж ахуйн газарт лаборатори байдаг. Тэнд төрөл бүрийн вакцин, эм тариа, оношлуур байдаг. Энэ бүхэн байрны оршин суугчдад аюул учруулна. Тэдний амь нас, эрүүл мэнд аюултай түвшинд хүрч мэднэ. Иймээс ирэх оны төсөвт болон ямар нэгэн байдлаар аймгийн Хүнс, хөдөө аж ахуйн газрыг тусад нь байртай болгохгүй бол байрны оршин суугч, иргэдийн хувьд аюул учирч байгаа учраас даруйхан байртай болгох тал дээр анхаарч өгнө үү” гэсэн юм. Шадар сайд Ө.Энхтүвшингийн хувьд энэ асуудалд тоймтой хариулт өгөөгүй ч өнөөдөр бодит байдал дээр тодорхой хэмжээнд аюул бий гэдгийг хэлж, сануулсан Ж.Сауле сайдад талархах хэрэгтэй болов уу. Аймгийн хүнс, хөдөө аж ахуйн газрын дэргэд ариун цэврийн лаборатори байдаг. Үүгээр зогсохгүй малын эм бэлдмэл, вакцин зэрэг хүнд хортой бүтээгдэхүүн хадгалагддаг ажээ. [sgmb id="1"]